RD Minister in SARAS Fair vawi 7-na hawngin hnathawk tha te chawimawina hlan an ni

Thingtlang-a kut hnathawktu hmeichhiate kutchhuak zawrhna, Sale of Articles of Rural Artisans Society (SARAS) Fair vawi 7-na chu nimin khan Aizawl-a Assembly Annexe Conference Hall-ah Rural Development Minister Lalruatkima’n a hawng.

Mizoram State Rural Livelihoods Mission (MzSRLM) leh Rural Development Department buatsaih SARAS Fair vawi 7-na hawnna hunah hian RD Minister chuan Sawrkar chuan thingtlanga chengte chawikanna tur Schemes leh Programme hrang hrangte a ngai pawimawh a, theihtawp chhuahin ruahmanna a duang zel a ni, a ti a. Chhungkua leh khawtlang chawikang thei kum 2013 khan MzSRLM chu sawrkar-in a din thu sawiin, MzSRLM hnuaia Self Help Group (SHG) member ten thahnem ngai takin an thawk thin chu lawmawm a tih thu leh harsatna hrang hrang pawh an tawng thin tih sawrkar chuan a hriatpui thu a sawi a, an harsatna ah MzSRLM chuan SHG member te a chhawmdawl zel dawn a ni, a ti a. SHG chu Bank a inngat an ni tih sawiin, Loan petu Bank a hnathawkte an pawimawh hle a ni, a ti a, “SHG rintlak taka kalpui te chuan hamthatna dang pawh an hmu zel a, an la hmu zel dawn bawk a ni,” a ti a. Sawrkar chuan AGEY te ruahmanin SHG ten an chakhai lam nan te, damdawi In an panna leh an eizawnna tihhmasawnna tur atan Motor 48 lai vailiam a nih tawh thu a sawi bawk.

He hunah hian Award semchhuah niin Award semte hi Best Community Cadres (IBCB/FI/Farm/Non-Farm) hnenah pek an ni a, hei bakah hian kum 2019-20 chhunga MZSRLM hnuaia Block tha bera thlanchhuah pathum- Reiek RD Block, W. Phaileng RD Block leh Bunghmun RD Block chu Award hlan an ni bawk a. Heng RD Block pathum te hi Financial Inclusion leh MzSRLM hnuaia hnathawh tur target an zawhfel that avanga hlan an ni a. Champion Bankers chu mi pathum- Andrew C. Ngaihte, Manager MRB Kawrthah Branch; H. Lalramdina, Manager Co-operative Apex Bank Siaha Branch leh H. Vanlalbiaknia, Manager SBI Ngopa Branch te hnenah Loan semchhuah-a an hnathawh that avangin pek an ni a. Best VO pathum thlanchhuah Sangau VO-II, East Lungdar VO-I leh Chungtlang VO bakah Self Help Group tha pathum- Sipai Lui SHG (Khawzawl RD Block); Pangpar Bawm SHG (Ngopa RD Block) leh Chuailo SHG (Khawbung RD Block) te hnenah lawmman pek an ni bawk.