Serchhip-ah P&E Department-a thawktute tan Fimkhur a pawimawh zia inzirtirna neih a ni

Power and Electricity (P&E) Department Serchhip Power Sub-Division hnuaia Electric Line leh Maintenance Staff te tan nimin khan Electric avanga vanduaina thleng palh thei pumpelh nana hriat tur pawimawh hrang hrang inzirtirna neih a ni.
P&E Control Room Serchhip P&E Veng-a Electrical Safety chungchang inzirtirna hun hi Serchhip Power Sub-Division a SDO C. Zairemmawia chuan kaihruaiin Electrical Safety chungchangah P&E Department Chief Engineer (Distribution) hnuaia EE, SDO leh JE zawng zawngte inkokhawma fimkhur tura inzirtirna leh infuihtharna neih anih hnuah he hmalakna kal zelah he hun hi buatsaih a nih thu a sawi a. Electric Department a thawktute chu hna pawimawh tak thawktu an nih rualin vanduaina tawk palh thei an nih avanga fimkhur a tul thu a sawi a. Hunpui vuakvet lo thleng turah pawh Kawn leh kawtthler cheina atan Electric tam tak kan hman leh tawh thu sawiin, heng te hi vanduaina thlen palh thei thil te a nih avangin hmalatu ten Department-a dilna siam se fimkhur taka hmalak tlan a tul thu leh tun thlengin dilna siam erawh an la awm loh thu a sawi bawk.

He hunah hian Serchhip Power Sub-Division a JE Ramhmunsanga chuan Electric Shot down lak dawna hriat tur pawimawh te sawiin, 11kV chin ah Electric Shot down dawn reng reng in JE hriatpuina lak ngei ngei tur a ni tih sawiin, hemi hnu hian Line Off ngei a ni em tih fiah ngei ngei tur a ni tih a sawi a. An hnathawh chu a pawimawh avangin taksa fit tak nen hna an thawh a tul thu sawiin, chumi tichhe thei laka inven a tul thu leh rilru leh taksa a harhfim taka hna an thawh a pawimawh thu a sawi a. Hmun hrang hranga hna thawk thin an nih avangin Feeder pakhat-a Off vek lovin Transformer tinah Off thin a tul thu te, Shut down lak reng rengin an hmalak dan inhriattir tura fimkhur a tul thu te a sawi bawk.

Serchhip Power Sub-Division a Feeder Manager C. Zakunga pawhin Control Room-a Duty leh Line a thawktute chu an pawimawhna inang an nih thu sawiin, khawi hmunah pawh line an khawih dawn a nih chuan Control Room lama in hriattir zel tur a nih thu te, namnul taka hna thawh loh tur a nih thu leh thawhhona tha tak nen hna an thawh tlan a tul thu a sawi bawk. He hunah hian Serchhip, Bungtlang, Keitum, Hriangtlang, Rullam leh Vanchengte atangin Electric Workers, Line Staff, Emergency Duty, Electrician, Control Room Duty, WT Operator leh Storekeeper te an tel a ni.