MPCC in UCC kan dodal a ngai niin an sawi

Mizoram Pradesh Congress Committee (MPCC) chuan Uniform Civil Code (UCC) chu India ram Kristiante tana Dan Sakei a ni dawn tih sawiin, Mizoram mipuiin kan dodal a ngai niin an sawi.

Nimin a thuchhuah an siamah MPCC chuan December 9, 2022-a India ram rorelna In pakhat, Rajya Sabha-a Uniform Civil Code (UCC) pharh remtih a ni ta chu Congress party chuan pawi a ti takzet tih tarlangin, BJP rorelna hnuaiah India rama hnam tenau zawkte, Mizo hnam leh kan Kristianna dinhmun thlengin a derthawng chho zel niin an tarlang a. “India ramah hian hnam leh Sakhaw hrang hrang tam tak kan awm a. Heng hnam leh Sakhaw hrang hrangte hian kan hnamzia a zirin Hnam Dan (Customary Law) pawh kan nei hrang thliah,” tiin “Hetianga hnam leh Sakhaw hrang hrangten kalphung fel tak kan neih thinte hi Uniform Civil Code (UCC) chuan nuaibo vek a, India ram pumah Dan pakhat, inang tlang vek min hman tir a tum ta a ni,” an ti.

MPCC chuan he Dan chungchanga Vote lak a nih laia Mizoram Rajya Sabha MP K. Vanlalvena House-a a awm loh chungchang ah, “December ni 9 chawhnu dar 2:30 leh dar 5:00 inkarah Private Member Bill 'The Uniform Civil Code in India Bill, 2020' hi sawiho hmasak ber tur a ni tih a hma ni hnih, December 6-a List of Business tih chhuah ah chiang taka tarlan a nih tawh avangin MP Pu K. Vanlalvena hian a hre lawk vek a ni. Chuvangin, hre lawk vek chunga UCC dodal tura House-a a awm lo lui hi Mizoram Kristian-te tan pawm theih a ni lo a, Kristian sakhua leh Mizorama hnam hrang hrangte phatsanna dik tak a ni,” an ti bawk.

MPCC chuan Mizote hian kan hnam leh Sakhaw kalphungte humhim turin UCC hi nasa taka kan dodal a ngai tih pawh tarlangin, Dan puitlinga siam a nih hma ngeiin Kohhran leh NGO-te, Political Party zawng zawngte pawh kan hnam leh sakhaw himna tura theihtawpa UCC dodal a tangrual tura an sawm thu an tarlang a ni.