Latest News

Serchhip District Police ten Crime Review Meeting an nei

Serchhip District Police te chuan Vawiin khan Serchhip SP Stephen Lalrinawma hovin Crime Review Meeting an nei a, kumin chhung hian Vawiin thlengin Serchhip District-ah Police ten thubuai 156 an ziaklut tawh a ni.

Serchhip SP Conference Hall-a Crime Review Meeting hi Serchhip SP Stephen Lalrinawma chuan kaihruaiin Serchhip Addl. SP Saidingliana Sailo leh SDPO Kaste Romalsawma bakah Serchhip District chhunga Police Station hrang hrang leh SP Office atangin Officer te an tel a, Serchhip SP chuan kumin chhungin Serchhip District Executive Force (DEF) ten dan leh thupek kenkawh chungchang ah hna an thawk tha hle tih sawiin, a thawhpuite chhungah lawmthu a sawi a ni.


He hunah hian kumin chhunga Serchhip District Police te hnathawh dan hrang hrang tarlan niin kum 2022 January atanga December ni 19, 2022 thleng hian Serchhip District chhungah thubuai 156 ziahluh a ni tawh a, heng thubuai ziahluh atang hian Case 138 chu chinfel niin chargesheet thehluh a ni tawh a, tunah hian Case 18 chu chhui mek a la ni. Heng thubuai ziahluh zingah hian rukruk thubuai a tam ber a, thubuai 94 ziahluh a ni a, naupang chunga hursualna thleng (POCSO) ah thubuai 8 ziahluh a ni a. Ruihhlo, a bikin Heroin No. 4 man chungchang bikah thubuai 18 lai ziahluh niin ruihhlo (Heroin) kg. 2.427 man ni tawh bawkin hei hi International Market Rate-a chhutin Rs. 12,18,50,000/- hu vel a ni a. Zu kaihhnawihah thubuai 6 ziahluh a ni a, heng Zu kan mante hi Rakzu litre 874 niin tualchhunga an hralhna rate anga chhutin Rs. 1,90,250/- hu vel a ni.

Kum 2022 chhung hian Police te thubuai ziahluh tam tak Court-in rorelna a tihchhuah zingah Fast Track Special Court, Aizawl chuan Thenzawl Police Station-a POCSO Act kaihhnawih thubuai ziahluh ah dan bawhchhetu Lalhlimpuia (57), Dinthar Veng, Thenzawl chu hrehawm taka kum 20 chhung Jail tang tur leh Rs. 10,000/- chawi turin hremna thupek a chhuah a, Serchhip Police Station-a thubuai ziahluh POCSO Act a dan bawhchhetu J. Sanglura (59), Chhingchhip Venglai chu hreawm taka kum 20 chhung Jail tang tur leh Rs.10,000/- chawi turin hremna thupek tihchhuah a ni bawk.


Kumin chhung hian Serchhip District Police ten Serchhip District chhunga School hrang hrangah Awareness Campaign neiin Ruihhlo chungchangte, Naupang kumtlinglo chunga hmeichhiat mipat hmansualna (POCSO) chungchangte, Cyber Crime chungchangte, Hmeichhiate chunga hleilenna chungchangte leh Ruihhlo ti lo tura intiamna (Signatur Campaign) te neih a ni a. District chhunga zirna in 40-ah Awareness hi neih niin zirlai 3732 leh Zirtirtu 225 an tel a ni.

Inner Line Permit (ILP) enfiah hna chu kum 2022 March thla atang khan thlatin Police Station leh Out Post ten an nei thin a, mi 159 te ILP endik niin chung zinga mi 28 te chu an permit a felloh avangin thubuai siamsak niin Court ah thawn an ni.




Hei bakah hian Serchhip District chhungah ramsa leh nungchate humhalhna kawnga hma la turin District Wildlife Control Sub-Unit din a ni a, an ni hian danin a phalloh ramsa leh nungcha te Silai, Sairawkherh leh Thang hmanga kutthlak tumte zawngin Patrolling an nei thin a, Bazar leh a chhehvelah Ramsa rep zuar an awm leh awmloh an enfiah thin bawk a ni.

Comments

Popular News (Last 30 Days)