Chief Minister in banna thehlut tura a tih angin Dr. K. Beichhua in Minister atangin banna a thehlut

/

Chief Minister Zoramthanga kaihhruai MNF Ministry-a Minister of State nilai Dr. K. Beichhua chuan Chief Minister in banna thehlut tura a tih angin nimin khan Minister a nihna atanga banna a thehlut a. Thuthar thehdarhtute zawhna chhangin Dr. Beichhua chuan a hmalam hun tur sawi theih a nei rih lo tih a sawi.

Mizoram sawrkar-a Minister of State ni-a Excise & Narcotics Department, Social Welfare, AH&Vety leh Sericulture Department changtu, Dr. K. Beichhua hian nimin khan Chief Minister Zoramthanga chu a Pisa-ah hmuin Minister of State a nihna atanga banna hi a thehlut a, a lehkha thehluh ah hian Dr. K. Beichhua hian Chief Minister hnen atanga lehkha a hmuh ah Cabinet Minister leh an hna chanpual (Portfolio) te siam danglam duh a nih thu leh Minister of State a nihna atanga banna thehlut tura tura tih a nih angin banna hi a thehlut tih a tarlang a. Chief Minister-in a duhsakna leh chhawmdawl tawhnaah lawmthu sawiin, Pathian awmpuina leh kaihhruaina chang zel turin duhsakna a hlan a ni.

Chief Minister hnena banna a thehluh zawha thuthar thehdarhtute zawhna chhangin, Dr. K Beichhua chuan niminpiah tlai dar 4:00 dawn khan Chief Minister hnen atangin lehkha hi a dawn thu a sawi a, Mara Autonomous District Council (MADC) buaina vang a nih leh nih loh thuthar thehdarhtute zawhna chhangin, Dr. K. Beichhua chuan, banna thehlut tura tih a nih nachhan sawi mai theih a neilo nia sawiin, “Hotute thupek kenkawh kawngah hian rinawm leh thuawih lutuk hi a tawrh ve theih a nih dawn hi tih ngaihdan erawh ka nei,” a ti.

MNF Party-ah a la awm thu leh hnawh-chuah a nih loh thu sawi bawkin Dr. Beichhua chuan, rinawm taka MNF a awm mek a nih thu a sawi a, “Ka hmalam tur erawh chu sawi theih ka nei rih lo a, ka bial mipuite, min thlang tute thu leh hla ni turah ka ngai,” a ti.

Dr. K Beichhua hi Siaha bial atangin tum hnih MLA atan MNF Ticket-a thlantlin ni tawhin Congress sawrkar liamta a MNF in MLA an neih tlemte zinga mi a ni a. Nimin-a Minister atanga banna a thehluhna hunah hian MADC leh Siaha District-a MNF hruaitu mi engemawzatin an tawiawm a, an zingah hian District President hlui C. Lawbei leh District Council Chairman N. Viakhu te pawh an tel a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »