Mizoram-ah Chikungunya kai 53 hmu tawhin Kumin-ah Dengue kai 1,510 an awm tawh bawk

Mizoram-ah Thosi seh atanga kai theih, Chikungunya vei mi 53 hmuhchhuah ni tawhin kumin chhungin Dengue hri kai 1,510 hmuh an ni tawh bawk.

Health Department-a thawktute sawi danin Mizoram-ah kumin December ni 8, 2022 thleng khan thisen endik 195 atangin Chikungunya vei mi 53 hmuhchhuah an ni tawh a, heng te hi Lunglei District-ah 47, Lawngtlai District-ah 4 leh Aizawl West District-ah 2 te niin Mizoram District dangah erawh Chikungunya vei hmuhchhuah an la awm lo a, rinhlelh endik pawh an la awm lo a. Lunglei District-ah thisen endik 189 nei tawhin, Lawngtlai District-ah 4 leh Aizawl West District-ah 2 enfiah a awm tawh a ni. Medical mithiam te chuan Chikungunya hi khawsik sang tak nei thut, taksa leh tihrawl na, chauh ngawih ngawihna, lu na, luakchhuak leh thak-in a langchhuak thin tih an sawi a, Chikungunya hi Malaria pai Thosi ang nilo Thosi tial, chhun-a mi seh thin te atanga kai theih niin Chikungunya natna hmuhchhuahte awmna Veng ah chuan Thosi chu awm tura ngaih a ni tih an sawi a, chutiang Thosi laka inven leh Thosi inthlahpun theihna hmun tihchhiat te chu invenna pawimawh a nih thu an sawi bawk.

Hetihlai hian Mizoram-a hri leng Dengue chuan ziaawm lam panin kumin chhung hian he natna kai mi 1,510 zet hmuhchhuah an awm tawh bawk a, Health Department-a State Vector Borne Disease Control Program (SVBDCP) hotute sawi danin kumin chhunga Dengue hri kai mi 1,510 zinga 1,370 hi Aizawl District ami an ni a, Lunglei District-ah mi 51 leh Champhai District-ah mi 34 an awm bawk a, mi 5 in an thihpui tawh bawk a ni. Dengue an kai leh kai loh endik zat hi mi 4,557 ni tawhin State pumah November thla chhung khan Dengue kai thar 108 an awm a ni. Kum bul lamah kha chuan Dengue hri kaite hian an lak nat vak loh thu leh Dengue Fever satliah a nih hlawm vang niin SVBDCP hotute chuan an sawi a. Favang intan chhovah hian Dengue na chi, Dengue Hemorrhagic Fever a tam chho tan a, nunna chan an awm phah ta hial tih sawiin, kum hmasa lam aiin kumin hian Dengue hri a leng nasa-in he natna vei pawh hi an pung nasa hle tih an sawi a. Kum hmasa lama Mizoram a Dengue hri kai tam berah mi 580 in kaiin, kumin ah chuan a let zet a tling a. Kum 2017 khan mi 136 ten kaiin kum 2019-ah 131 an awm bawk a. Kum 2020 leh 2021-ah tr COVID-19 hri leng avanga inkharkhip deuh reng a nih avangin Dengue hi a hluar lo bawk a ni.