Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Elementary atangin Skill Development kalpui tum

School Education Minister Lalchhandama Ralte chuan zirna School-ah Elementary atangin Skill Development kalpui tum a nih thu a sawi.

Nimin-a St. Francis of Assisi Church Hall, Durtlang Leitan-a St. Francis of Assisi School Parents Day a hmanpuina ah Education Minister Lalchhandama Ralte chuan zirna School-ah Elementary atangin Skill Development kalpui tum a nih thu hi sawiin, Subject pakhatah telh tum mek a ni, a ti a. Zirlai ten Skill Development an zir theihna turin bag ah loh ni siam tum a nih thu sawiin, “Nakum atang chuan School bag ah loh ni (bagless day) pawh kum khatah ni 10 aia tam mah hman a, naupangten zirlaibu ak lova Skill Development an zir theihna tur siam a ni dawn a, School routine-ah te pawh telh a ni dawn a ni,” a ti a. Zirlaiten nun an hman thiama thiam thil an neihna tur ang chi te zirtir an ni ang tih sawiin, “Anmahni cho phur thei tur mithiamte thusawi tura sawm a, naupangte fuih phur thin an ni dawn a, chumi atan chuan sawrkar a inbuatsaih mek a ni,” a ti bawk.

Zirna leh Culture a kalkawp a ngai tih pawh Education Minister chuan sawiin, NEP 2020 duhdan angin Tawng chungchangah mahni tawng uar tir a, zirlaibu-ah pawh mahni hnamzia telna pholan tum mek a nih thu a sawi a. “Zirlaibu ennawn mekah pawh Mizo hnam thil ngaihhlutna tur te, Mizo hnam ropuizia naupangte rilru-ah tuh te pawh a tul a, hnamdang ropui zia ngawt zir lovin Mizo hnam ropuizia hi zirlaiten an hriat a ngai a ni,” a ti a. Mission-in a enkawl School-te hi thawktute inpekna a thuk avangin khawtlang tan an hlu hle tih pawh sawiin, Co-Curricular Activities te pawh tha taka an kalpui avangin a lawmawm hle a ni, a ti a. Mizoram-ah Kohhran hrang hrangte zirna ah an inhmang tam sawt hle tih sawiin, Mission enkawl School-ah te hian naupangte hi an kalna awm kawngah an hruai niin a hriat a, hei vang hian ram tan an pawimawh hle a ni, a ti bawk.

St. Francis of Assisi School, Durtlang hi kum 1996 khan Catholic Church Durtlang chuan a din a, a tirah chuan Class KG-I leh KG-II chauhin bultan a ni a, kumtin Class pakhat hawn belhin tunah hian KG-I atangin Class VIII thleng zirtirna an kalpui mek a. Kum 2000 atangin Capuchin Puithiam, Holy Trinity Province, Karnataka ten enkawl chhunzawmin tun thlengin an la enkawl zel a, Charity Sister ten School-ah hian zirtir hna an thawk bawk a. Tunah hian zirlai 750 awmin Father 2 leh Sister 2 bakah Teacher 15, Non-Teaching 3 an awm a ni. Nimin a Parents Day-ah hian zirlaiten zai leh lam chi hrang hrang bakah lemchan te an entir a ni.

Comments

Popular News (Last 30 Days)