Zirlai harsate hnenah tanpuina hlan an ni

Lengteng bial chhung leh Sialkal Range Development Council (SRDC) Area chhunga zirlai thiam thei, First Division leh a chunglam pass, chhungkaw harsa thlanchhuah zirlai 38 te hnenah Inrinni khan tanpuina sum sem a ni.

Tanpuina semna hun MZP Conference Hall-a neih ah Lengteng bialtu MLA leh SRDC Chairman Dr. L.Thangmawia chuan kum 2018 khan MLA Fund hman theihna pakhat ‘GIA to Educational Insitutions’ tih thin chu ‘GIA to Education’ ti a thlak turin thutlukna a siam thu leh zirna In (Institution) chauha MLA Fund hman theih thin kha zau zawkin zirna lamah a hman theih ta tih a sawi a. An bial chhungah pawh zirtirtu rawih nan te, IAS nih tum puih nan te, sikul mamawh lei nan te, Sikul te Sports-a telna atan leh zirlai harsa tanpuina leh thil dang hrang hrangah hman a nih thu te a sawi a ni.

MLA Fund atanga zirlai tanpuina hi BDO, Ngopa Chairman-na hnuaiah a thlang tur Committee awmin First Division-a pass chin, chhungkaw harsa atanga thlan an ni a. Kum 2019 khan zirlai 13 tan Rs. 2,10,000 leh kum 2020-ah zirlai 18 tan Rs. 2,50,000 sem a lo ni tawh a. Hripui leng avangin kum 2021 khan sem a ni lova, kumin hian zirlai 29 thlanchhuah te tan Rs 3,94,000 sem a ni. SRDC Fund atanga zirlai tanpuina hi SRDC hnuaia Hostel & Education Committee-in a thlante an ni a. Kum 2020 khan zirlai 15 te tan Rs. 2,00,000 sem niin kumin hian zirlai 9 te tan Rs 1,16,000 semchhuah a ni bawk.