Helmet chungchang nakum ah bawhzui dawn

Helmet (Protective Headgear) him leh rin-tlak chauh khum tura thuchhuah siam tawh chu kumthar March ni 1, 2023 atangin khauh lehzuala kenkawh a ni dawn.

Hemi chungchanga Sr. Traffic SP Rodingliana Chawngthu in thuchhuah siama a tarlan danin, Ministry of Road Transport & Highways, Govt. of India lehkha te, Supreme Court Committee on Road Safety lehkha te, The Helmet for riders of Two Wheeler Motor Vehicles (Quality control) Order, 2020, Govt. of Mizoram, Transport Department lehkha leh Section 129 of the Motor Vehicles Act, 1988-in a sawi angin, Two Wheeler khalhtu te’n Helmet (Protective Headgear) him leh rintlak; a siamdan leh nihphungah pawh Bureau of Indian Standards-in a pawm chin leh a tlukpui Helmet tha leh him chin chauh khum tur a ni tih a tarlang a.

Mizoram-a kan hman lar tak, Satel Helmet kan tih mai te pawh hi Bureau of Indian Standards pha lo anih avangin khum phal a ni lo tih leh Bureau of Indian Standards pha lo Helmet khum avanga accident tawk thenkhat ten nunna hial an chan fo thin thu leh a pawi thu pawh tarlangin, “He thuchhuah hi Dt. 01.03.2023 atangin khauh lehzuala kenkawh a ni ang,” a ti a. Lirthei (Two Wheeler) khalhtu ten harsatna an tawh loh nan leh an himna tur a ni tih hriaa lo inhmakhua lawk turin ngen leh hriattir an nih thu a tarlang bawk.