Mizoram-ah HIV hrik pai 27,241 awmin HIV hrik kai hmuhchhuah zingah thalai an tam

Mizoram State AIDS Control Society (MSACS) chhinchhiah danin Mizoram-a HIV+ hmuhchhuah tawh zat chu mi 27,241 an ni a, chung zinga a tam ber, 22,774 (83.60%) chu thalai kum 15-49 inkar niin HIV inkaichhawnna tam ber chu mipat hmeichhiatna niin thihpui mi 3,506 an awm tawh.

MSACS report thar bera a lan danin Mizoram-a HIV hrik pai hmuh hmasak ber, October, 1990 atanga kumin (2022) September thleng khan Mizoram-ah thisen endik 6,05,713 ni tawhin heng atang hian HIV hrik pai mi 27,241 hmuhchhuah a ni tawh a, thisen endik zat atanga HIV hrik pai zat chu 4.11% a ni. Kum kal mek 2022-23 (April - September) chhunga thisen endik 27,081 atangin HIV hri kai 1,185 (4.4%) hmuhchhuah a ni tawh a, raipuar 11,154 thisen endik zingah HIV hmuhchhuah mi 96 (0.9%) an awm bawk.

Hetihlai hian kum liam ta, kum 2021-22 chhunga thisen endik 40,171 atanga HIV hrik pai hmuhchhuah zat chu 1,601 (4.0)%) a ni a, nau pai thisen endik 19,473 atanga HIV hrik pai hmuh chhuah zat chu 177 (0.9%) a ni thung a. MSACS chhinchhiah danin Mizoram-ah HIV/AIDS vanga thi mi 3,506 an awm tawh a, chung zinga mi 2,250 chu mipa niin, hmeichhia 1,187 an ni a, an zinga 69-te chu naupang an ni.

National AIDS Control Organisation (NACO)-in an zirchianna, India HIV Estimates, 2019 an tihchhuah ah India rama kum 15-49 inkar HIV+ percent-ah Mizoram chu 1-na (2.32%) a ni a, 2-na chu Nagaland (1.45%) niin 3-na chu Manipur (1.18%) an ni. Hei bakah hian kumtin mi 1,000 atanga kai thar awm zatah pawh India ramah Mizoram chu 1-na niin, mi 1,000 zelah 1.18 (1.18 per 1,000 uninfected population)-in an kai a, pahinhna chu Nagaland niin 0.73 an ni bawk.

Serchhip District Hospital-a ICTC chhinchhiahna atanga a lan danin Serchhip bikah kum 2003-a thisen an enfiah atanga kumin November 30 thleng khan thisen enfiah 32,441 awm tawhin HIV hrik pai 494 hmuh an ni bawk a, kumin bikah November thla thleng khan thisen enfiah 2647 awmin HIV hrik pai mi 58 hmuh an ni tawh bawk a ni.