Lenkawl

Manipur tualchhung buaina thleng avanga sahimna zawnga Serchhip District-a rawn lut chu mi 54 chhinchhiah an ni tawh a, thla hmasa May 26 hnu lamah sahimna zawnga rawn lut hi chhinchhiah belh an awm lo thung.

Chhiahtlang Kawn Veng Branch YMA chuan nimin khan YMA Day lawmin an Branch dinchampha kum 25-na, Silver Jubilee an lawm a, he hun hi bialtu MLA leh Minister Er. Lalrinawma chuan khuallian niin a hmanpui a ni.

Lunglei-a 2nd Inter District Cricket Tournament khelh mekah Serchhip District chuan nimin khan Siaha an hneh loh avangin Final thleng zo lovin an tla ta.

Nimin-a Vairengte leh Bilkhawthlir inkara lirthei-a chetsualna thlengah Samuel Vanlalhmachhuana (16), New Serchhip Venglai chu boral in Vawiin hian Serchhip-ah vuiliam tura ruahman a ni.

YMA Day vawi 88-na chu nimin khan Serchhip-a YMA Branch hrang hrangten urhsun takin an hmang a, nizan thlenga YMA Day puala programme siam chhunzawm te pawh an awm bawk a ni. YMA Day pual hian Branch tam ber te chuan chawhma lamah inkhawm neiin chawhnu lamah intihhlimna nena hun hmang an awm bawk a, ruai siama hun hmang an awm bakah hnatlang nei te pawh an awm bawk a ni. Serchhip Sub-Hqrs. YMA chuan Serchhip-a damdawi In, Jail leh Home hrang hrang hmun 7-ah Rs. 2000/- theuh an hlan bawk a ni.

Khawzawl District Bawrhsap K. Lalrohlua chuan nimin khan Rs. 28,70,000 senga sak Sialhawk North Branch YMA Hall chu a hawng a, Sialhawk Branch YMA ten YMA Day an lawmna chu a hmanpui nghal bawk. Khawzawl DC chuan Mizoram chu Zo hnathlak zawng zawngte Inpui a nih thu sawiin, hei hi vawngnung tlat turin YMA member kalkhawmte a chah bawk.

Manipur-a buaina chhuak avanga sahimna zawnga Mizoram-a rawn raltlan te tana Central YMA in Transit Camp an buatsaih chu nimin thleng khan mi 289 in an pan tawh a, heng raltlan te hi Aizawl khawpui chhunga YMA Branch hrang hrang ten mikhual ve lehin Central YMA Transit Camp, Tuikhuahtlang-ah hian mi 61 an awm mek bawk a ni.

Mizoram Police Special Narcotics PS leh 2nd Bn. Assam Rifles te chuan nminpiah tlai khan Aizawl Zemabawk area-ah Joint Operation neiin Heroin No. 4 Hawng 88, kg. 1.026 an man a, heng damdawi te hi Hmingthansanga (38), Ngur (Champhai District) nia insawi hnen atanga man niin international market-ah cheng vbc. 5 chuang man nia chhut a ni. Heng ruihhlo an man chhui zuina kal zelah Lalsanga Sailo (34), Ngur khua nia insawi pawh manin thubuai siam sak an ni a, a tul anga la chhui zui mek a ni bawk.

Khawzawl leh Neihdawn inkar Tuimuk lui a cheng nuai 15 seng-a Lei (Bailey Bridge) dawh thar chu niminpiah khan Champhai North Bialtu MLA Dr. ZR. Thiamsanga chuan a hawng a, he Lei hi lirthei Ton 20-a rit phur dawlzo tur a ngaih niin kumin April ni 26 khan dawh tanin, tun thla ni 3 khan zawhfel a ni. He hunah hian Dr. ZR. Thiamsanga chuan, Tuimuk lei dawh a nih theihna tura hmalak a nih dan kawng hrang hrang tarlangin, a taka lei dawh a nih theihna tura tha tam tak senga thawktute chu fakawm a tih thu a sawi bawk.

Lawngtlai District MJA te chuan kum 2016 atanga kumtin ‘Green MJA Day’ an hman thin angin nimin khan ‘Green MJA Day’ hi hmangin State sawrkar leh LADC sawrkar in Lawngtlai leh Mampui inkara thing an lo phun tawh te samfaiin thawh-that ngai te an thawmtha a, Lawngtlai District MJA te chuan Green MJA Day chu thingphun leh enkawlzuina ah midangte kaiharha zirtirtu a nih beiseia hmang thin an nih thu sawiin, Thingphun leh enkawl zui ah Lawngtlai District in hmasawnna duhawm tak a hmu chho chu lawmawm an tih thu an sawi a. Hmasawnna hnathawh ten ramngaw leh nungcha, luidung a tichhe nasa lutuk thin chu nakin ah tawrhna nasa zawk thlentu tur leh a nghawng hmuhtheiha langchho mek a nih avangin awmze nei zawka hmasawnna hna te chu thawh thin ni se an duh thu an sawi bawk.