Minister Er. Lalrinawma’n Chhiahtlang Kawn Veng ah YMA Day leh Silver Jubilee lawmna a hmanpui

Chhiahtlang Kawn Veng Branch YMA chuan nimin khan YMA Day lawmin an Branch dinchampha kum 25-na, Silver Jubilee an lawm a, he hun hi bialtu MLA leh Minister Er. Lalrinawma chuan khuallian niin a hmanpui a ni.
Chhiahtlang Kawn-a YMA Day leh an Branch YMA Silver Jubilee lawmna hunah hian bialtu MLA chuan YMA Day leh Silver Jubilee lawm theia an awm avangin Chhiahtlang Kawn Veng Branch YMA te a lawmpui thu sawiin, duhsakna chibai a buk a, an kalzelna turah duhsakna hlanin, hripui avanga hun thim an tawh laia Pathian hruaina an chanah lawmthu a sawi a, chutihlaiin hri vanga MLA Funds hmanga hmasawnna hnathawhna kawnga an duh anga tam an kalpui theih loh phah thung tih a sawi bawk a ni. Minister Er. Lalrinawma chuan YMA kumpuan 'Ram leh Hnam humhalh' chu thupui pawimawh tak a nih thu sawiin, sawrkar pawhin theihtawp chhuahin a beih reng thu a sawi a. Tunlaia kan sawi fo Uniform Civil Code (UCC) chu India leh MNF inremna thuthlung kalh tlat nia sawiin, kan ram leh hnam tana tha lo anih avangin duhlohna thu lungrual takin Mizoram Legislative Assembly-ah pass a nih thu a sawi bawk a ni.


Remna leh muanna kan neihin a hrinchhuah pakhat zinga mi Mizoram University (MZU) chu India ramah zirna In tha a ni pha ta hial chu a ropui hle tih pawh Minister chuan sawiin, kan ram leh hnam dinngheh zel nan he zirna In hi a pawimawh hle a ni, a ti a. Khawvel hnamte zingah eitur tlakchham vanga ral ta an awm thu sawi tur a vang hle tih sawiin, “Chuvang chuan kan ram leh hnam a dinngheh zel theih nan fa neih tam a tul tih hi thinlungah i vawng reng ang u,” a ti a. Pathian in khawvel hnam tinte chu tihdan phung leh hnam ziarang min pe theuh tih pawh sawiin, hei hi kan zahpui tur a ni lova, kan theih tawkin kan chawilar zawk tur a ni, a ti a. Tunlai a natna hlauhawm HIV/AIDS laka him nan mipat hmeichhiatna kawngah YMA member te chu inthiarfihlim turin YMA Member kalkhawmte chu a sawm bawk.

Chhiahtlang Kawn Veng Branch YMA President H. Lalchhuangliana kaihhruai he hunah hian Branch YMA Secretary Lalzidinga Ralte chuan Report pein kum 1998 khan Chhiahtlang Kawn Veng Branch YMA hi ding tanin kumin 2023 hi an kum 25-na a ni a, tunah hian YMA Member 612 an awm mek a ni.

Nimin-a he hun hmanpuitu bialtu MLA Er. Lalrinawma hian Chhiahtlang Kawn Veng Branch ten 'YMA In' an sak mek tanpui nan leh an Silver Jubilee lawmpui nan MLA Funds atangin Rs. 1,50,000/- pe in, Chhiahtlang Kawn Veng Branch YMA ten an Silver Jubilee puala Booklet an buatsaih chu a tlangzarh nghal bawk a. Hruaitu hlui te chawimawina hun hmangin Silver Jubilee hriatrengna lungphun an buatsaih bakah Carnival buatsaih a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar