Serchhip-ah ‘World Hearing Day’ hmangin Police te ri hriatna a thlawna enfiah sak an ni

Naktuk-a ‘World Hearing Day’ lo thleng tur pualin nimin khan Serchhip SP Conference Hall-ah hun hman niin Serchhip District-a Police te a thlawnin ri an hriatna enfiah sak an ni.
Kumtin March 3-a ‘World Hearing Day’ chu kumin hian sawrkar Pisa chawlh a nih avangin Serchhip-ah chuan nimin khan National Programme for Prevention and Control of Deafness (NPPCD) Serchhip District buatsaihin he ni pual hian hun hman a ni a, he hun hi Serchhip SP Stephen Lalrinawma chuan kaihruaiin mihring te chu kan kum a lo tamin harsatna hrang hrang kan taksa-ah a awm theih thu leh heng te hi hma taka hriatchhuah a nih chuan awlsam taka enkawl dam theih a nih thin thu a sawi a. Office-a thawk te tan chuan an Mit leh Beng chu an hnathawhna hmanraw pawimawh tak a nih thu sawiin, hei vang hian kum 40 an tlin hnuah phei chuan mithiam te inenfiah tir thin a pawimawh thu a sawi a. Chutiang hun remchang Serchhip District-a NPPCD ten an buatsaih sak chu lawmawm a tih thu a sawi bawk.


He hunah hian NPPDC Serchhip District Nodal Officer Dr. Joseph Lalmuanpuia Hauzel chuan he ni an hman chhan te sawiin, mihring kum a lo tamin hrisel lohna dang vang ni kher lo pawhin taksa ah hriatna te a chak lo thei tih a sawi a. Mi tam tak ten an Mit a that loh avanga Tarmit vuah pawi an tih loh laiin ri hriatna lam tha lo ten Bengdar vuah an duh lo tlat thin chu pawi a tih thu sawiin, Ri hriatna chaklo leh tha lo ten Bengdar an vuah chu rual an pawl ve na zawk a ni tih an hriata Bengdar vuah chu zah-ah lak loh tur a nih thu a sawi bawk.

Serchhip District Hospital-a Audiologist Mary Lalchawimawii pawhin National Health Mission (NHM) hnuaia Serchhip District-a NPPCD kalpui a nih dan leh hma an lak dan hrang hrangte he hunah hian tarlangin, kum 2017 atangin Serchhip District-ah NPPCD hi kalpui a nih thu te, nikum chhung khan Serchhip District-ah tum 14 lai ri hriatna enfiahna hun an buatsaih thu te, Beng-a ri hriatna tha lo nei te hmuhchhuah chu an tum a nih thu leh ri hriatna tha lo chu hmuh theih mai-a natna a nih loh avangin mahni in enfiah thin a tul thu te pawh a sawi bawk.


‘World Hearing Day’ pual hian Serchhip SP Office-ah Serchhip District-a Police te tan ri hriatna lama harsatna nei te enfiahna neih nghal niin nimin khan mi 15 enfiah an ni a, hemi rual hian taksa lama harsatna an neih dang te pawh a thlawna enfiah sak an ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar