Serchhip-ah District Bawrhsap hovin Chapchar Kut 2023 uar taka hman a ni
Serchhip-a Chapchar Kut hmanna ah hian District Bawrhsap Nazuk Kumar IAS chu Kut Nu atana hman niin Kut Nu chuan Kut hmang tura kal zawng zawngte chibai a buk a, Mizo pi leh pute khan Chapchar Kut hlim taka an hman theih nan nupa-a inrem loh te, chhungkaw hlim tlan loh te, khawtlang dam tlan loh te an hlauva, an inbuatsaih thin tih sawiin, “Keini pawhin an tihdan entawnin chhungkua, thenawm leh khawtlangte inrem thar ila, intanpui tawn ila he hunpui hi nuam takin inlawm ang u,” a ti a. “Kan pi leh pute nun dan mawi Zonun zemawi tlawmngaihna, rinawmna, aia upate zah thiamna te chawi nung zelin, Zofate inpumkhatna ngai pawimawh ila. Hnam inthuamna mawi leh mit la tak tak kan neih te, hnam lam leh hla nalh tak tak kan neihte vawnghim tlat chungin khawvel zau zawkah phochhuak thiam ila, kan tu leh fateah pawh nghet taka tuh i tum zel ang u,” tiin mipuite a sawm a ni. Bawrhsap chuan khawvela ram mawi leh nuam ber te zinga mi kan nei tih inhriain, kan ram leh a chhunga nungchate, kan ramngawte venhim leh enkawl kawngah pawh bei sauh sauh tura mipuite chu sawmin, “He ram hi nakin thlenga kan tu leh fate chenna tlak ram duhawm leh nuama siam hi kan mawhphurhna pawimawh a ni,” a ti bawk.
Serchhip-a Chapchar Kut hmanna ah hian Sub-Hqrs. YMA Prrsident Kawlthuama chu Kut Thlengtu niin mipuiten hlim taka Kut an hman theih nan an theih ang tawkin an inbuatsaih tih sawiin, hlim taka Kut hmang turin a sawm a. Kumin-a kan kut thupui hi Zofate Inpumkhatna a nih angin mitin thinlung hmun khat pua, inunauna te, intanpui tawn dial dial duhna thinlung te nei thar chunga hun duhawm tak hmang turin a sawm a ni.
Serchhip-ah hian kum 2019-a Chapchar Kut hman a nih hnuah hri leng avangin kum thum lai Chapchar Kut hi hman zui mumal a ni ta lo a, kumin a Chapchar Kut hman hi mipui ten an hlutin kal pawh an tam hle a. Chawhma lamah Serchhip-a YMA Branch hrang hrang ten Cheraw (Kantluang) leh Khuallam te entirin YMA Chhang ten Siktuithiang Lam an entir a, MHIP Sub-Hqrs. Serchhip bakah Govt. Serchhip College-a Phunchawng Cultural Club, Little Flower Convent School leh Goodwill English Academy bakah Hualtu Branch YMA ten Hnam lam an entir a, chawhnu lamah zaithiam te nen zai hmanga intihhlimna hun hman a ni bawk.
Comments
Post a Comment