DAY-NULM hmalakna in Serchhip-ah Exhibition Fair & Street Food Festival neih a ni
Serchhip District Urban Development Officer (DUDO) Lalrinsanga Hnamte kaihhruaia ‘Exhibition Fair & Street Food Festival’ hawnna hun tawi neih ah District Bawrhsap Nazuk Kumar chuan hun engemaw chen hnuah UD&PA Department in hetiang hun an buatsaih leh thei ta chu lawmawm a tih thu sawiin, National Urban Livelihoods Mission (NULM) chu khawpuia cheng ten eizawnna ngelnghet an neih theihna tura Scheme pawimawh tak a nih thu a sawi a. Hemi kawnga hmalakna ah hian thiam thil inzirtirna te pawh neih thin a nih thu leh hei hi he hmalakna in a tum pawimawh tak pakhat pawh a nih thu a sawi a. Tun tum-a buatsaih Exhibition Fair & Street Food Festival-a tel te chu tun aia hmasawn zel tum tura chah bawkin an thil siamchhuah te zau zawka hralhna zawnga thang lian zel tura tan la turin a chah a. Serchhip District chu Puantah leh Furniture siam bakah thlai tharchhuah kawngah kan sang hle tih sawiin, heng te pawh hi zau zawka hralhchhuah dan dap zel a tul thu leh hemi kawngah hian tunlaia hman uar tak, Online Shopping te pawh kan hman tangkai a tul thu a sawi a. Chutianga hralhchhuah tlak siamchhuak thei tura hmalak a tul thu leh puih an ngai a nih pawhin UD&PA Department bakah amah ngei pawh a inhuam thu a sawi bawk.
Naktuk thleng awh tur ‘Exhibition Fair & Street Food Festival’ ah hian dawr 22 hawn niin a tlangpuiin Serchhip khawchhunga Self Help Group (SHG) te an ni a, SHG te hian an thil siamchhuah hrang hrangte chu mipuite en theih tura an phochhuah bakah a duh apiangte tana lei theih tura dah a ni a, heng bakah hian mimal thenkhat ten dawr an hawng bawk a. Heng dawr hrang hrangte hi Bawrhsap chuan a hmunah tlawhin an thil phochhuah te chu a en sak bawk a ni.
Comments
Post a Comment