Lenkawl

Tuichawng Group YMA te chuan Central YMA atanga Bangladesh raltlante tanpuina an dawn Rs. 50,000/- hmangin nimin khan an huamchhunga raltlan te awmna khaw hrang hrangah Buhfai an sem a, Tuichawng Group YMA hruaitute chuan raltlan tanpuina hi tum hniha pek tumin hun remchang hmasa berah hlan leh an tum thu an sawi a ni. Tuichawng Group YMA huam-chhungah hian tun dinhmunah Bangladesh raltlan mi 900 vel an awm mek a ni.

Mizo Academy of Letters (MAL) chuan kum 2023 chhunga Mizo tawng lehkhabu tha ber thlanna an kalpui leh mek a, kum danga an thlan dan angin March thla chawhma lamah khan nikum chhunga lehkhabu chhuak te atangin a tha zual 20 thlangchhuakin March thla chawhnu lamah lehkhabu 20 atang hian lehkhabu 10 an thlang leh a, chuta tang chuan tunah lehkhabu tha zual pathum an thlang leh tawh a, heng te hi ‘Hniak Hlu’ (Ziaktu Zaii Khiangte); ‘Pangparhnima’ (Ziaktu Ahmangaihi Khiangte) leh ‘Raltiang Rimawi’ (Ziaktu Lalhruaitluanga Chawngte) te an ni a. Heng atang hian Book of the Year thlan a ni ang.

Mizoram Police Subordinate Officers’ Association (MPSOA) hruaitu chuan tunhnai khan Chief Minister Lalduhoma hmuin District hrang hranga Subordinate Police indaihlohna chungchang thlenin Post ruak 4356 chu hnawhkhat rang turin an ngen a. Anti-Corruption Bureau (ACB) a Deputation posts an neih ve chhun luahkhah loha awm thin chu pawi an tih thu pawh thlenin, State chhunga Corruption dona kawnga hnu-chhuitu ber Agency- ACB chu thuam chak turin an ngen bawk a. Subordinate Police-te promotion hun rei tak tak a tangkhang thin chung-chang pawh an thlen nghal bawk a. Chief Minister chuan sawrkar sum dinhmun hmasawn dan azirin thawktu indaihlohna chu an ngaihtuah tur thu a lo hrilh a ni.

Mizoram sawrkar in tum khata khawphetha leina atana sum a pekchhuah tam ber ni turin tunhnai khan Finance Department chuan heng vbc. 81.69 chu a pechhuak.

ZPM Lok Sabha MP Candidate Richard Vanlalhmangaiha chuan sum tih chingpen chungchanga amah puh hmingchhetute chhui turin Aizawl District Chief Judicial Magistrate hnenah Criminal Complaint-a thehlut.

Tun thla ni 19-a Mizoram Lok Sabha Inthlanpui neih tur atan Candidate hrang hrangte chuan ngawrh takin Campaign an nei chho mek zel.

Mizoram Lok Sabha Inthlanpui neih turah mipui ten tluang taka Vote an thlak theih nan Mizoram Police ten theihtawp chhuaha inbuatsaihna an kalpui chu Mizoram DGP Anil Shukla chuan a sawi.

Mizo Zirlai Pawl (MZP) te chuan nimin atang khan Mizoram Public Service Commission (MPSC) Office-a hnathawk te Pisa kai tur an dang.

Inrinni (April 13, 2024) zan dar 10:00 vel khan Vairengte Chhim Veng-a Sumneihkhawli (78) te chenna In, Assam type chu bungrua engmah chuh hman lohin a kang a, In kan lai hian In neitu hi In chhungah awmin kangmei a chhuak tih hriat a nih hian a tupa In hnuaia awm Lalherliana chuan a pi chhan tumin In chhungah hian a zuanglut a, a pi hi tukverh ah zuanchhuahpuiin damdawi In panpui ni mah se a lo kan nasat deuh avangin a pi hi a boral zui a, amah Lalherliana pawh hian hliam a tuar a ni.

Seling khua atanga Thingsulthliah pana kal Auto Rickshaw pakhat chu nimin tlai khan Thingsulthliah khawchhung ah chesualin kawngthlang ah a tlanliam a, he Auto Rickshaw-a chung mi pali zinga pathum chu a hmunah boralin midang pakhat pawh hian hliam a tuar a ni.

Mizoram Kohhran Hruaitu Committee (MKHC) ngenna angin Kohhran hrang hrangte chuan Inrinni zan atanga nizan thleng khan Lok Sabha Inthlanpui neih tur atana tawngtai rualna hun an remchan angin an hmang a, Inthlanna felfai neih a nih theihna atan leh Sakhaw zalenna tha tak a awm zel theihna atan bakah Kristian te rawngbawlna nekchepa a awm loh nan te an tawngtai a ni.

PC Party chuan Inrinni khan thuchhuah siamin an Candidate Rita Malsawmi Vote turin mipuite an sawm a, an Candidate chu Chhinlung chhuak Zofate inpumkhatna tura rim taka thawktu a nih thu leh Zofa thendarha awmte insuihkhawm leh theihna tura ZORO in theihtawp chhuaha a hmalakna-a Mizo hmeichhia te zinga mi a nih thu an sawi bawk.

Tunkar Zirtawpni-a Mizoram Lok Sabha Inthlanpui neih turah Tar chak lo leh Vohbikte puala anmahni In lum-a Vote thlak theihna siam chu Vawiin hian zawhfel theih beisei a ni a, Election Department sawi danin kum upa mahni In luma vote thlak dil 1,823 leh Vohbik zingah In lama vote thlak dil mi 302, an vaiin mi 2,125 awmin pawm vek a ni a, In lama vote thlak buaipui tur hian Mobile Polling Team 99 din a ni bawk.

Mara Students’ Organisation (MSO) General Conference vawi 30-na chu April 10-12, 2024 chhung khan Siaha District-a Chhaolo khua ah neih a ni a, MSO Founder puanna neih a nih bakah kum 2024 atanga 2026 thlenga MSO hruaitu tur thlanna neih a ni bawk. MSO chuan Zirlaite hmasawnna chu a tum ber a nih angin, hmasawnna rahbi thar an kai theih nan kumin a Conference Rorel-ah hian Agenda 48 chhawpchhuah zingah Agenda 43 pass a ni. MSO General Conference-ah hian Branch 68 zingah 67 leh Sub-Hqrs. 9 zingah 7 atangin Palai 2000 chuang an tel a ni. 

Lok Sabha Inthlanpui neih turah mipui ten Vote thlak a pawimawh zia an hriatna atan leh Vote thlak tura inzirtirna atan Inrinni zing khan Aizawl Kulikawn Tri-Junction atanga Thuampui thlengin Cycle Rally buatsaih a ni a. Chief Electoral Officer (CEO), Mizoram Office leh Mizoram Cycling Association (MiCA) tangdun buatsaih he Rally-a tel te hi Addl. CEO Prasanna A. Acharya chuan vailiamin tunkar Zirtawpni-a Lok Sabha inthlanpui neih turah vote a tlak hat theih nan mahni zawn theuh ah tan la turin kalkhawmte a sawm a. Rally kharna hun Thuampui-a neih ah Dr. H. Lianzela, Addl. CEO chuan kan hma lawka Lok Sabha MP inthlan lo awm tur chu Mizoram a MP thlanna neih tawh zawng zawnga vote tlak that berna a nih theih nan MiCA member te chu mipuite hnenah palai an ni nghal tih a sawi bawk.

Kangmei laka himna tur inzirtirna hun, Fire Service Week chu India ram hmun dangte rualin nimin atang khan Mizoram-ah pawh hman tan a ni a, nimin khan Martyrs Day/Commemoration Day Parade hman a ni.

MNF Party chuan, “Thla li chuang hlek enchhin tawhah ZPM sawrkar kalphung a lang chiang tawh a, MP inthlana vote zui zel hi mipui in kan ba tawh lo a ni,” an ti.

Bru ten an kumthar chinchhiahna atana an hman thin ‘Boisu Festival’ chu Inrinni khan Vaivakawn Cultural Centre-cum-Auditorium-ah hmangin he hun hi Governor Dr. Hari Babu Kambhampati chuan khuallian niin a hmanpui a ni.

March 11, 2019-a Mizoram Larsap in Chairman a lakluh hnua a taka hna thawk tan, Mizoram Lokayukta chuan eiruk thubuai chhui tur 54 a dawng tawh a, kumin ah pakhat a dawng tawh bawk.

All Mizoram Car Rental Association (AMCRA) chuan thu belhchian dawl lo hmanga an beih avangin Adviser to Chief Minister leh MLA TBC. Lalvenchhunga hnenah ngaihdam an dil.