LESDE Minister in Serchhip tiamin Mizoram District 11-a zirna In 12-ah ‘Skill Lab’ a hawng

Zirlaiten zirna leh IT lama thiamna an neih theihna tura hmalakna atan ‘Skill Lab’ chu nimin khan Labour, Employment, Skill Development & Entrepreneurship (LESDE) Department chuangtu Minister Lalnghinglova Hmar chuan Mizoram-a School 12 te tan a hawng.
Skill Lab hi SANKALP Scheme hnuaiah Mizoram District 11-a School 12 ah din niin Minister chuan Aizawl-a Govt. K.M. High School atangin a hawng a, khawvel thiamna inher danglam zel mila zirlaite pawh an inzir zel a pawimawh thu sawiin, khawvelin hma a sawn zela, thiamna thar lo chhuakte thiam ve lo chu kalsan an ni dawn tih a sawi a, zirlaite chuan Skill Lab hawn thar chu IT lam an hmelhriata an thiam ve theihna tur leh hmang tangkai turin a chah a ni. Hei bakah hian Minister chuan lehkha thiamna hmanga hna hmuh vek theih a nih loh avangin eizawnna tlaka thiamthil (skill) neih a pawimawh thu sawiin, chumi kawnga thalaite pui turin ITI-ah te Skill hrang hrang, Drone hman dan thlengin zir theih a nih thu a sawi a, zirlaite chu Mizoram Youth Commission leh ITI tlawh tura a duh thu sawiin, an veivah man tumsak a inhuam thu a sawi bawk.

LESDE Department chuan School Education Department nen tangkawpin sawrkar School thlanbikte ah Skill Labs din a nih theih nan hma a la a. Skill Lab din a nih hian zirlaite chu zirna leh hnathawhna lama hmasawnna atana thiamna pawimawh tak tak pek tum a ni a. He hmalaknaah hian Mizoram chhunga District 11 huamchhunga sawrkar School 12-ah Skill Labs din a ni a, zirlai 2,413 velin an hlawkpui theih beisei a ni. Heng Skill Lab dinna te hi Aizawl District-a School pahnih bakah District dang zawngah School pakhat theuh a ni a, Serchhip District-ah pawh Govt. Serchhip H/S-ah hawn niin Skill Labs hnuaiah hian School thlanbik te hnenah hian Desktop Computer 10 theuh, Printer pakhat theuh leh Projector pakhat theuh pek an ni a. Heng bakah hian School zawng zawngah Skill Lab siam nan hian Room awmsa te chu thawmthat (renovate) vek bawk a ni. 

IT Sector hnuaia Course on Computer Concepts (CCC) hmanga Digital Literacy leh IT thiamna tihpun chu ngaih pawimawh a ni a. He course hmang hian zirlaite hnenah computer application leh Digital Literacy lama Foundational Knowledge pek tum a ni a. He program hian Practical Learning a ngaih pawimawh bakah zirlaiten tunlai khawvel tana IT thiamna pawimawh tak tak an neih theih nan a pui dawn a ni.