FCAA-2023 chuan a ram mite thuneihna leh chanvo nasa takin a nekchep thei niin sawi

MNF General Secretary leh MLA hlui, Prof. F. Lalnunmawia chuan FCAA-2023 in kan ramngaw leh leilung humhalh kawngah a ram mite thuneihna leh chanvo nasa takin a nekchep thei niin a sawi.

Aizawl-a Mizo Hnam Run chhung inkhawm nimin-a neih ah Prof. F. Lalnunmawia chuan tunhnaia Mizoram Legislative Assembly-in a pawm (adopt) tak Forest Conservation Amendment Act, 2023 chungchang hi sawiin, “FCAA-2023 hian kan ramngaw leh leilung humhalh kawngah a ram mite thuneihna leh chanvo nasa takin a nekchep thei a ni,” tiin, “FCAA-2023 chungchang ah sawrkar lam leh anmahni tantu ten FCAA-2023 hlauhawm loh dan leh Article 371(G) hmanga dodal theih a nih loh thu an sawi a; chutih laiin keini ang tho a inhumhalhna dan (Article 371A) nei Nagaland State Assembly chuan an dodal (oppose) thung,” a ti a. “He Dan hi kan Environment leh Zofate hmalam hun hriltu pawimawh tak a nih theih avangin kan thalai te leh zirlaite pawhin an ngaihven a tul hle a ni. FCAA-2023 hmang hian kan ram leh ramngaw te hi hun reilote chhungin an ti chereu vek kher lo ang. Mahse, hun lokal zel turah Project pawimawh (National Importance) changchawiin zawi zawiin kan ram zimte ah hian Sawrkar laipuiin Defence installation leh Mineral resources haichhuahna lamah awlsam zawk hmalak theihna kawng a rawn hawng ta a ni,” a ti bawk.

Prof. F. Lalnunmawia chuan in humhimna dan nei ve lo te pawhin huaisen taka an ram leilung leh ramngaw tihchhiat tur an dodal laia, kan hmanraw neih Article 371(G) chu eng anga tha leh chak nge tih pawh enchhin ngam lo leh tang eih lova sawrkar in FCAA 2023 a pawmpui mai chu a pawi thu sawiin, “FCAA-2023 hian kan hma hunah eng angin nge nghawng thalo a neih theih tih hi ZPM Research Wing leh VUC te hian zirchiang leh deuh turin thurawn ka pe duh,” a ti a. Sawrkar lai mek policy kalpui dan hrim hrim chu a Eco-friendly lo hle nia a hriat thu pawh sawiin, “Sawhthing policy te hi ram leilung tihchhiatna a ni. Chuvang chuan an lo insawi tawh thin angin Research-base in kal rawh se tiin kan phut a ni,” a ti a. “Kan sawrkar hian a tlachawp mai mai ni lo, hmasawnna tluantling (Sustainable development) kalpui turin ngaihtuahna seng turin ka ngen a ni,” a ti bawk.