Lenkawl

Serchhip District chhunga raltlan awm mek mi 558 te hnenah Vawiin atang khan tanpuina buhfai leh sum semchhuah a ni.

Vawiin khan Serchhip District Bawrhsap Paul L.Khuma hovin Serchhip DC Pisapui Hall-ah Good Governance Week hawnna inkhawm neih a ni.

Serchhip Officers’ Club (SOC) chuan nimin khan Bukpui-a P&E Rest House-ah General Body Meeting neiin hruaitu an thlang a, Advance Krismas leh Charity Programme an nei nghal bawk.

Vawiin, December 19, 2024-a LENKAWL rawn chhuak hi kumin (2024) atana kan Chanchinbu rawn chhuak hnuhnung ber tura ruahman a ni a, KRISMAS leh KUMTHAR chawlh hmangin kumthar lamah rawn tihchhuah leh tum a ni ang. Thu chhuah tur pawimawh leh hmanhmawh thlak a awm a nih erawh chuan a remchan anga rawn tihchhuah a ni ang. Chanchinbu chawlh kan hman chhungin thuthar pawimawh te Social Media lama kan account kaltlangin rawn tihchhuah \hin tum a ni bawk ang.

Election Commission of India ruahman anga Electoral Roll ennawn hna leh State Election Commission in ruahmanna a siam anga Village Council Inthlanpui-a hman tur Electoral Roll ennawn hna chu kalpui mek a ni a, ECI ruahman anga Electoral Roll ennawn ah hian dilna lut te enfiah fel tawhin VC Electoral Roll-a dilna lut te hi Vawiin lamah enfiah zawh leh a ni anga. Hemi hnu hian Electoral Roll thar chhut hna chu thawh zui nghal turin niin kumthar January thla tir lamah heng Electoral Roll pahnih te hi peihfelin hman theih tura tlangzarh a ni ang.

Sawrkar laipui in ruahmanna a siam angin Serchhip District-a raltlan awm mek te chu naktuk Dec. 20, 2024 atang hian a thlawnin buhfai sem an ni dawn a, tun dinhmunah Serchhip District-ah raltlan 558 an awm mek nia chhinchhiah niin mi pakhat tan buhfai kg. 21 zela sem tura ruahman a ni.

Serchhip IOC Veng atanga P&E Veng panna kawng, Tlangnuam peng leh Addl. SP Quarters inkar kawngpui siamthat hna chu Vawiin atang hian thawh tan a ni dawn a, naktuk Dec. 20, 2024 thlenga tawh tur a ni ang. He kawng siam chhung hian IOC Veng atanga P&E Veng-a kal duhte chuan Quarry Road lamah kal theih a ni ang.

Serchhip District-ah ni 4 chhung African Swine Fever (ASF) vanga Vawk thi leh Vawk suat chhin-chhiah a awm belh tawh lo a, kumin chhung hian Serchhip District-ah ASF avanga Vawk thi 3527 awm tawhin Vawk 7069 suat a ni tawh bawk a, kumin chhunga ASF avanga Serchhip District-a Vawk chan tawh zawng zawng chu 10,596 a tling tawh a ni. Serchhip District-ah hian kumin chhunga ASF vanga Vawk thi tamna ber chu Thenzawl niin Vawk 1059 zet a thi a, Vawk suat tamna ber chu Chhingchhip niin Vawk 1305 suat a ni tawh bawk a ni.

Bana Kaih Scheme hnuaia Progress Partners te loan pekna atan Mizoram Sawrkar leh Partner Banks te chuan nimin khan inremna (Memorandum of Agreement) an ziak a, he hunah hian Chief Minister Lalduhoma chuan ‘Chief Minister's Bana Kaih Innovation Challenge’ a hawng bawk.

Hnahthial Town Sanitation Task Force leh Sub-Hqrs. YMA Hnahthial te tangkawpin Hnahthial Town chhunga Veng Fai Inelnaan buatsaih lawmman semna chu nimin khan neih niin Veng fai ber lawmman chu Chanmari Veng in an dawng a, Model Veng in lawmman pahnihna leh Lung-leng Veng in lawmman pathumna dawngin Veng paruk ten Participation Prize an dawng bawk.

Pukzing khua chuan tunkar Thawhtanni leh Thawhlehni khan an khawchhuak, hmun hrang hranga awm te Haw runpui hmangin he hun hi Bialtu MLA Lalrintluanga Sailo chuan khuallian niin a hmanpui a. Pukzing khua hi kum 1807-ah din niin tunah hian In dinglai 117 a awm a, mihring 450 bawr vel awmin pawl 10 thleng zirna In a awm bawk a ni.

Champhai District Jail-a tang hmeichhe pahnih te chu nimin zing dar 2:00 vel khan Jail atangin an tlanchhuak a, zawn mek an ni. Thudawn danin Jail tang tlanchhuak te hi Vansuieni (36), Tahan C (Myanmar) leh Lalchhanmawii, Khawmawi (Myanmar) te niin Jail hungna rangva tichhiain an tlanchhuak nia hriat a ni a, heng mi pahnih te hi Heroin kaihhnawiha man leh thubuai nei niin an thubuai hi ngaihtuah mek a ni. Lalchhanmawii hi Nov. 30, 2023 khan Central Women Jail, Ai-zawl atangin a lo tlanchhuak tawh a, hun engemaw chen a bikbo hnuah kumin May 11 khan Cham-phai Police ten manin Jail-a khung a nih hnuah a tlanchhuak leh ta a ni.

Nimin khan CSR Cell chu an Chairman leh Adviser to Chief Minister TBC. Lalvenchhunga hovin a Pisa-ah an thukhawm a., an hmalak tawhna te thlirletin, hmachhawp an neih te an sawiho a ni. December ni 10 khan CSR Cell hian Aizawl-a I&PR Conference Hall-ah Mizorama CSR Fund dil thei registration nei leh neih tum pawl, sawrkar Department, Agency leh Deputy Commissioner zawng zawngte sawmin Awareness Campaign a buatsaih a, hei hi thlirletin ngaihventu an tha tawk nia an hriat avangin an lawm hle a ni.

Lawngtlai-a District Sericulture Office bultumin nimin khan 'Eri cut Cocoon Flag off Prog-ramme' hman niin Lawngtlai Bawrhsap Cheemala Siva Gopal Reddy chuan heng Cocoon te hi a vailiam a ni. He hunah hian Lawngtlai DSO Lal-rammawia chuan kumin chhunga an Cocoon thar te chu Directorate Office, Chaltlang-ah thawn phawtin hemi atang hian Phai lamah hralh leh tur a nih thu a sawi a. Kumin chu an bultan kum a ni chunga Cocoon quintal thum chuang leh Buhchium quintal 20 chuang an thar thei chu thil lawmawm tak a ni tih a sawi a. Buhchium chu Local Market-ah hralh a kal thu sawiin, farmer- te sum lakluhna ber pakhat a nih thu a sawi bawk.

Mizoram chhunga mahni kutkawih thiamna leh insakna bakah hmasawnna hnathawh kawnga nitina inhlawhfa thin ten hamthatna an neih theihna atana din, Mizoram Building and Other Construction Workers Welfare Board (MBOCWWB) hnuaia Welfare Fund siamah mi 19,487 an inziaklut tawh.

Mizoram PWD chuan tun dinhmunah kawngpui thar, a vai a belh-khawmin  kilometre 845.18 sial mek a nih thu an sawi.

ZPM Thalaite chuan an Party in kum khat (1) chhung rorelna an chan chhunga Mizoram-ah Administrative Reform leh Mipuite Moral Reform tamtak an thlentir hman chu lawmawm an tih thu an sawi.

Aizawl South-III Bialtu MLA Baryl Vanneihsangi chuan nimin khan Governor Dr. Hari Babu Kambhampati chu hmuin Centrally Sponsored Scheme, Social Security Scheme leh pawimawh dangte mipuite'n an chhawr tangkai thei dan tur an sawidun.

Mizoram sawrkar Power & Electricity Department hnuaia Mizoram State Load Despatch Centre (SLDC) chuan Grid India leh Forum of Load Despatcher (FOLD) in rampum huap intihsiakna a buatsaih, 4th LDC Excellence Awards 2024-ah Emerging LDC Category-ah lawmman pakhatna a dawng.

Mizoram Governor Dr. Hari Babu Kambhampati chuan Oil Palm tharchhuah kawnga theihna nasa tak nei Mizoram-ah theihtawp chhuaha hmalak a tul thu a sawi.

 

Mizoram sawrkar chuan Serchhip Chhim Veng leh Serchhip Kawnpui VC ramri chu siamthain Serchhip Bazar Hnuai Area chu Serchhip Kawnpui VC huamchhungah a awm tawh ang.

Serchhip District chhung Hmuntha khuaa cheng V. Lalruathlua (43) chu Melthum dai-a midang puih a tumna ah chesualin nimin khan a boral a, nimin vek khan vuiliam nghal a ni.

Serchhip P&E Veng-a Leisekawt Mual zauh tura ram lak dan tur chungchang chu nimin khan Bawrhsap hovin RD Department hotute nen sawiho leh a ni a, tuna ram laih bak chu laih leh a nih chuan BDO Office lam tana hlauhawm thei a awm nia hriat a nih avangin mithiam ten enfiah se, a tul anga la sawiho zel nise an ti bawk.

Serchhip District Wrestling Association te chuan kum 2024-2026 chhunga an hruaitu tur thlanna neiin President-ah K. Tlangthanmawia (Bazar Veng); Sr. Vice President-ah T. Lalengruala (Lower Chanmari); Vice President-ah C. Lalchungnunga (East Lungdar); General Secretary-ah Dominic Zarzosanga (Chanmari Vengthar); Joint Secretary-ah Zothansanga (Chhim Veng); Treasurer-ah Vanlalruata (Vengchung) leh Fin. Secretary-ah Lalnunkima (AOC Veng) te thlan an ni.

Nimin atang khan Thenzawl-a Police Training School (PTS)-ah Winter Carnival neih tan a ni a, Vawiin hian chhunzawmin zanin-ah khar a ni ang.

China rama kan pi leh pu te luh dan - Rev. Dr. Zaichhâwna Hlâwndo

AH&Vety Minister C. Lalsawivunga chuan nimin khan Saitual District Veterinary Hospital a hawng a, Sawrkar hmasain bul a lo tan tawh Saitual District Veterinary Hospital bakah Laboratory building leh Veterinary Officer Quarters hawn a ni chu lawmawm a tih thu sawiin, Mizote chu ranvulh mi kan nih thu sawiin, AH& Vety Department chu Mizote tan Department pawimawh leh tangkai tak a nih thu a sawi bawk.

Mizo Students’ Union (MSU) General Hqrs. chuan Aizawl-a an Pisa, MSU Pisa Pui chu kumin atana kharna hun nimin khan an hmang a, he hunah hian MSU President B. Lalkhawngaihzuala chuan MSU chu zirlai pawl a nih angin Mizo zirlaite chanvo humhim turin theihtawpin ke a pen dawn tih a sawi a, Mizo zirlaite chu ram leh hnam hmangaihna thinlung nei chunga zirna kalpui turin a chah bakah MSU in zirlaite tana hmalak a tumna hrang hrang te a sawi bawk.  MSU Pisa Pui hi Mizo mipuite dawr theih turin nakum January 17-ah hawn leh ni ang.

Environment Forest & Climate Change (EF&CC) changtu Minister Lalthansanga chuan nimin khan Champhai Bethel Veng-a EF&CC Complex-ah cheng nuai 44 senga sak Conservator of Forest (Eastern Circle) Auditorium chu a hawng a, he Auditorium hi July ni 10, 2024 khan sak tan niin, December ni 12, 2024 khan sak zawh a ni a. A building hi a dung feet 72, a vang feet 39 niin square feet 3,528 a zau a ni a, Auditorium, Meeting Room leh inthiarna te a awm a. Training, Awareness Campaign leh meeting neihna tura ruahman a ni.

Mizoram Legislative Assembly-a Committee on Estimates chuan nimin khan an Chairman W. Chhuanawma hovin ‘Committee on Estimates First Report on Aizawl-Thenzawl-Lunglei World Bank Road under Public Works Department’ chu Assembly Speaker Lalbiakzama hnenah an pharh a, he Report-ah hian Committee on Estimates-in Mizoram-a kawng pawimawh berte zing ami ‘Aizawl-Thenzawl-Lunglei World Bank Road’ a PWD Department-in hna an thawh te leh Road chainage hrang hranga maintenance kalpui an endikna leh zirchianna te tarlan a ni.

Aizawl SP Rex Zarzoliana chuan sawrkar in hunpui vuakvet ah halpuah leh halmawi hal a khap angin, Police te chuan Halpuah leh halmawi zuar leh kawl dap hna an thawk mek tih a sawi a, tun thlengin halpuah leh halmawi thahnem tak man tawh niin, an man tawh zawng zawng hlut zawng hi Rs. 20,88,655 /- hu a tling tawh a, dan bawhchhia mi paruk (6) man tawh niin heng mi te hi thubuai siamsak zel an ni a, Jail-ah dahluh vek tawh an nih thu a sawi bawk. Police te hian Online hmanga hetiang thil zuar thin te pawh endikin an chhui zui bawk a ni.

Information & Communication Technology Department chuan niminpiah khan Directorate of ICT Conference Hall-ah an hmalakna thlirletna hun hmangin ICT Minister Dr. Vanlalthlana chuan a telpui a, Sawrkar tha (good governance) neih nan chuan khua leh tui thil hria (informed citizen) siam a ngaih thu te, chumi tura IT hmanga sawrkarin hmalakna hrang hrang a neih a tul thu leh chu chu tihlawhtling tur chuan ICT Department chu sawrkar kut-ke ber a nih thu a sawi a, ICT inrawlhna tel lo chuan sawrkar chak siam a har tawh a, Mizoram sawrkar hnuaia department hrang hrangte phuarkhawmtu leh sawrkar leh mipui thlunzawmtu ber chu ICT Department a nih thu te a sawi bawk. He hunah hian ICT-in project an enkawl mek chak zawka kalpui dan tur te, ICT-in hmachhawp an neih bawhzui dan tur leh kum thara atana an hmalak theihna turte sawiho a ni.

Sports Minister Lalnghinlova Hmar chuan Women's Junior Asia Cup (Hockey)-a Champion India Team-a tel Mizo pahnih te chu a chhuang takzet tih a sawi.

Mizoram khaw hrang hrang 301-a MGNR-EGS hnuaia Social Audit neih zawh tak thlirletna chu Social Audit Unit (SAU), Mizoram buatsaihin nimin khan Secretariat Conference Hall-II, MINECO-ah neih a ni.

Mizoram State Project Monitoring Committee (MSPMC) chu nimin khan Chief Minister Conference Hall-ah thukhawmin kumin September atanga November thla thlenga Project hrang hrang an enfiah te dinhmun an thlirho.

Power & Electricity Department changtu Minister F. Rodingliana chuan Ministry of Water Resources, Govt. of India chuan Tlawng HEP Survey & Investigation (S&I) thawh nan leh (DPR) siam nan kum 2014 khan cheng Vbc. 11.55 a sanctioned thu leh kum 2025 laihawl velah chuan DPR peihfel beisei a nih thu a sawi.

Serchhip District Magistrate chuan Ui vulh chungchangah thupek chhuah tharin khawlai ah Ui chhuah zalen loh tur a nih thu a tarlang.

Serchhip District Pik-Up Owners’ Association chuan nimin khan Assembly neiin an pawl hruaitu tur thlanna an nei.

Serchhip District-ah Inrinni atanga nimin thleng khan African Swine Fever (ASF) vanga Vawk thi leh suat chhinchhiah belh a awm lo a, kumin chhung hian Serchhip District-ah African Swine Fever avanga Vawk thi 3527 awm tawhin Vawk 7096 suat a ni tawh bawk a, khaw 31-a chhung-kaw 2127 te chuan ASF hri leng hi an tuar tawh a ni.

Union Minister of Youth Affairs and Sports, Dr. Mansukh Mandaviya chuan Vawiin hian New Delhi-ah 'Fit India Cycling Tuesdays' a hawng dawn a, Sports Authority of India (SAI) Regional Centre hrang hrangah te chuan Cycling Event an buatsaih anga, Thenzawl-ah chuan Thenzawl Football Field atanga Golf Course thlengin Cycle-a tlan tur a ni ang.

Mizoram Information Commission chuan Mizoram RTI Online-a State Public Information Officer (SPIO) la in register lo Department hrang hrang 11 hotute chu nimin khan Chief Information Commissioner John Neihlaia leh Information Commissioner Mangjangam Touthang te hmaah inlan turin an ko a, Department hotute hi RTI Online-ah an Department SPIO la in register lo te in register ngei a tul thu hrilhhriat an ni a, Department hotute pawh hian a hma thei ang bera MIC thuchhuak hi zawma hma lak an tum thu an sawi a ni. Vawiin hian SPIO la in register lo Department dang 16 te chu koh leh an ni ang.

Krismas 2024 lo thleng tur pualin Pathianni zan khan Governor Dr. Hari Babu Kambhampati leh a nupui Jayasree Kambhampati te chuan Mizoram Presbyterian Kohhran thuthmun Mission Veng Kohhran-ah Inkhawm an chhim a, Kohhran Committee-te chuan Inkhawm ban ah  Memento an hlan a ni. Governor hian Pre-Christmas Celebration programme chu English Congregation Church, Mission Veng-ah a lo hmanpui tawh a. Aizawl Bishop Most Reverend Stephen Rotluanga pawh tlawhin Raj Bhavan-ah Chrismas Carol hun hlimawm tak an lo hmang tawh a ni.

Mizoram Sawrkar Tourism Department buatsaih ‘Winter Festival 2024’ chu nimin khan Tourism Minister Lalrinpuii chuan Aizawl Lam-mual-ah a hawng a, Department-te mai bakah khawtlang, mimal leh pawl hrang hrangte tan pawha hlawkna thlen thei tur tinzawna sawrkar hmalakna chu chhunzawm tlak hle nia a hriat thu sawiin, Sawrkar chuan mipuite zirtirna lam hawi a kalpui uar zel a, hemi nena inhmeh tak Winter Festival buatsaih a ni chu tha a tih thu a sawi a. Mizoram chu India ram State dangte nena khaikhin pawhin Tourism Sector-a theihna leh remchanna ngah ber pawl a ni tih sawiin, hei hi hre renga sawrkar hmalakna te tun anga thlawp chhunzawm zel turin mipuite a sawm nghal bawk. Winter Festival 2024 hian tun thla ni 21 thleng a awh dawn a. AR Ground, Lammual bakah Reiek leh Hmuifang-ah te neih a ni dawn a ni. 

Chief Minister Lalduhoma chuan nimin khan Mizoram-a Rubber chin theihna hmun zawng zawnga Rubber chin vekna tur, ‘Chief Minister's Rubber Missions’ chu a hawng a, hemi puala Dawrpui Multipurpose Hall-a hun hman ah Mission bultanna tur RIDF XXX atanga cheng vbc. 27.98 sanction na lehkha chu Chief Minister hnenah hian Pankaja Borah, GM NABARD, Regional Office, Mizoram chuan a hlan a, he sum hmang hian District 7-a zau 24-ah bultan tur a ni anga. Chief Minister chuan thalaite chu hna-thawh a tui se, thapui thawhin rawn bei se an duh thu a sawi bawk.

Mizoram sawrkar-a Rural Development Department chuan ni 100 inhlawhna mipuite hnena pek a la nih loh chungchang an sawifiah.

GITAM University, Visakhapatnam chuan Mizoram sawrkar-a Horticulture leh Rural Development Department ten an mamawh anga an hman turin nimin khan ‘Hybrid Solar Dryer with Automated Temperature Controller Technology’ chu Minister Prof. Lalnilawma hnenah an hlan.

Mizoram-a a vawikhatna atan Vawiin, December ni 17, 2024 atanga karleh Thawhtanni, December ni 23 inkar chhung khian Tlaizawng leh Khawpuitan Hapta chu Chawngtlai khuaah hman a ni dawn.

Nimin December 16, 2024 khan Vijay Diwas (Hnehna Ni) pualin Aizawl Treasury Square-a War Memorial-ah Governor Dr. Hari Babu Kambhampati hovin sipai huaisen, ram tana nun hlantute hriatrengna leh zahna lantir nan pangpar dah a ni.

Governor Dr. Hari Babu Kambhampati chuan nimin khan Mizoram Youth Commission (MYC) Chairman Malsawmzuala Ralte chu Raj Bhavan-ah kawmin MYC hmalakna leh hmachhawp te a sawipui.

MNF President Zoramthanga chuan sawrkar hnathawk hlawh leh thildang pe thuai tura sawrkar a phut thu a sawi.

Chief Minister Lalduhoma chuan, Kalphung thar mipui Sawrkar in kumkhat chhung chauh pawhin ram rorelnaah danglamna tam tak a thlen tawh thu sawiin, “Kan ram rorelna kalphung a lo dik theihna turin kawng tam takin hma kan la mek bawk,” a ti.

 

The Salvation Army enkawl, Mizoram-a kum upa te enkawlna In hmasa ber, Beiseina In (Old Age Home), New Serchhip-a Senior Club Mizoram in Chawlhbuk an sak chu Inrinni khan hawnna neiin Pathian hnenah hlan a ni.

Serchhip-a neih ‘International Paragliding Accuracy Championship leh Air Sports Festival 2024’ chu Inrinni khan zawhfel niin a kharna hun hi Chief Minister Lalduhoma chuan a hmanpui a ni.

Chief Minister Lalduhoma chuan Football chu khawvel ngaihhlut infiamna a nih avangin a thiam te tan eizawnna remchang a tam thu a sawi.

Ramchhung hmundangte rualin Inrinni kalta, December 14, 2024 khan Serchhip-ah Lok Adalat thutkhawm neiin thubuai 33 zet chinfel leh a ni.

Tun thla ni 17 khian Assistant, Assistant Jailor, UDC leh Warden atana Common Competitive Examination chu neih a ni dawn a, Serchhip-ah pawh Exam Centre pahnih siam niin Govt. Serchhip College-ah Roll No. 13169 atanga 13444 thleng leh Govt. H/S Serchhip-ah 13444 atanga 13551 te Exam tur a ni ang.

Hrangturzo Bialtu MLA Lalmuanpuia Punte chuan kar hmasa chhung khan a Bial chhunga khaw hrang hrang tlawhin thilpek chi hrang hrang a sem.

Presbyterian Serchhip Bazar Kohhran in kum 25 a tlin lawmna chu nimin Pathianni hmang khan neih a ni. Serchhip Bazar Kohhran in kum 25 a tlin lawmna hi Zirtawpni zan atang khan neiin Jubilee dar vuak a ni a, Inrinni khan Jubilee hriatrengna lungphun hawn a ni a, chawhnu lamah Souvenir tlangzarhin Inrinni zan atanga nizan thleng khan Pathian biak Inkhawm neih zui a ni. Serchhip Bazar Kohhran hi Dec. 5, 1999 khan Preaching Station-a ding tanin Oct. 28, 2000-ah Kohhran Puitling-ah hlankai a ni a, Kohhran chhungkua 151-ah mi 680 an awm mek a, Dan zawhkim 526 an awm a ni.

Sawrkar hmasa hunlaia PAHOSS sum la hman ban cheng vbc. 20 chu Lunglei Municipal Council (LMC) tan dah hran a ni.

Kumin thla 11 (January atanga November thla inkar) chhung khan Mizoram-ah Dengue hri vei mi 719 hmuhchhuah a ni a, an zinga pakhat chu a thi.

Tun thla ni 12 thleng khan Mizoram a Jail hrang hrang 10-ah mi tang 1,643 an awm a, tang awm thei zat tura ruahman aia mi tang tamna chu 257 a tling a. Mizoram-a Jail hrang hrangah hian damchhunga Jail tang tura chungthu rel sak mi 54 an awm mek bawk a ni.

Lunglei Zotlang-a awm 20 Battalion Border Security Force (BSF) te chuan Zirtawpni khan 2nd Mizo Battalion National Cadet Corps (NCC) hnuaia NCC Cadet-te tan ralthuam entirna (weapon exhibition) an buatsaih a, he hun hi NCC Cadet mi 150 velin chhimin BSF hnathawh dan te an zirchiang nghal a ni.

National Handloom Development Prog-ramme (NHDP) hnuaia Small Cluster Development Programme (SCDP) kaltlangin Mualthuam 'N' a chhungkaw 173 leh Kanghmun 'S' khuaa chhungkaw 121 te hnenah Inrinni khan Puantah In (individual workshed) sakna tur Rs. 120,000/- theuh pek an ni.

November thla tawp thleng khan Mizoram ah lirthei inziaklut 3,23,083 a awm a, lirthei inziak-lut zingah hian lirthei ke pahnih nei tam berin 2,22,023 a awm a, Car 53,699 awmin a tam lamah a dawt a, bungraw phur chi 23,096 inziaklut an awm bawk. Transport Department in a tarlan danin Mizoram chhungah Taxi tlan mek 5,856 awmin, Two Wheeler Taxi 4,126 leh kar kawnga zin chi Maxi Cab 2,390 inziaklut an awm a ni. Nikum 2023 leh kumin November chhung khan lirthei inziaklut zat hi 40,063 in a pung a ni.

Krismas lo thleng tur pualin Inrinni zan khan Mizoram Governor Dr. Hari Babu Kambhampati leh a nupui Lady Governor Jayasree Kambhampati te hovin Raj Bhavan-ah ‘Christmas Carol’ hman a ni a, he hunah hian  Aizawl West-I Area Masihi Sangati, Mizoram Presbyterian Church member-te an tel bawk a ni. He hunah hian Governor Dr. Hari Babu Kambhampati te nupa chuan Mizoram mipuite Chrismas leh Kumthar hun hlimawm tak hmang turin duhsakna an hlan a. Governor chuan Chrismas lo thleng tur chuan remna leh muanna bakah inpumkhatna thlen se a duh thu a sawi bawk. 

Excise & Narcotics Department chuan kumin kumtir atanga November thla tawp thleng khan sawrkarah chhiah Rs. 187,95,019/- an chhunglut tawh a. Thla 11 chhung hian Excise & Narcotics Department hian Heroin kg 44.650, Ganja kg 560 leh Methamphetamine kg 134 an man a, ruihhlo phurhna atana hman lirthei Two Wheeler 46, Three Wheeler 10, LMV 73, MMV 1 leh HMV 1 an man bawk. November thla tawp thleng khan Excise & Narcotics Department hian ND&PS Act hnuaiah mihring 695, MLP Act hnuaiah mi 5154, ME Act hnuaiah mi 463 leh Drugs and Liquor Law hnuaiah mihring 44 an man tawh bawk a ni.

Chakma Autonomous District Council (CADC)-a MDC mi panga te chuan ZPM zawmin ZPM President Lalliansawta chuan a lawmlut a. Heti hian Seat 20 awmna CADC-ah hian ZPM chuan MDC 10 an nei ta a, BJP in MDC 9 leh MNF in MDC pakhat neiin sawrkar namthluk a ni tawh avangin ZPM hian sawrkar thar siam turin Vawiin hian Larsap hmuh an tum a ni.

Food, Civil Supplies & Consumer Affairs Minister B. Lalchhanzova’n krismas leh kumthar vuakvet atan Mizoramah buhfai dahkhawl a tam tawk tih sawiin, buhfai chhekkhawl chungchang ah harsatna lian tham thleng a awm tih a sawi a, tunhnai khan Bairabi-ah Transformer kang a awm avangin harsatna tenau deuh chu thleng ve mah se buaina lian a awm lo niin a sawi. Supply Minister B. Lalchhanzova chuan Food Corporation of India (FCI) atangin buhfai lakluh zel a nih thu pawh sawiin, hei bakah hian mipui mamawhna avangin hmun dang atanga lakluh a nih bawk thu a sawi a, hunpui lo thleng tur atan bufai-a buaina awm lo turin Mizoram sawrkar a inbuatsaih tih a sawi bawk.

Aizawl-a Falkland khawtlang chuan Inrinni khan an Vengchhung kawng, World Bank Road ti-a sawi a lei tlahniam chu hnatlang in siamthat hna an thawk.

Excise & Narcotics Minister Lalnghinglova Hmar chuan, “Thenawm leh hmelhriat ruihhlo zuar, thuneitute hnena report hi hek a ni lo a, ram leh hnam tana hna tangkai thawk an ni zawk,” a ti.

 

Serchhip DC Office chuan nimin khan Krismas leh Kumthar luanchhuah Programme hmangin he hun hi Bialtu MLA leh Chief Minister Lalduhoma chuan a telpui a, Infiamna lama Serchhip District tihmingthatute hnenah thilpek hlan an ni bawk.

Serchhip Sub-Hqrs. YMA leh Nehru Yuva Kendra (NYK) Serchhip District buatsaihin nizan hmasa khan Yuva Utsav hnuaiah Cultural Festival neih a ni.

Thla kalta November thla chhung khan Serchhip District-a mitthi aiin nau piang chhinchhiah chu 18 chauh in an tam zawk.

Serchhip District mipuite ruihhlo laka kan fihlim theih nan sawrkarin theihtawpin hma a la mek a. Serchhip District chhunga dan phal loh damdawi zawrh leh hralh a lo rem theih nan Serchhip District Magistrate Paul L. Khuma chuan Section 152 of Bharatiya Nagarik Suraksha Sanhita, 2023-in thuneihna a pek angin Serchhip District chhunga Schedule H leh Schedule X damdawi zawrhna dawr (pharmaceutical store) zawng zawng ah CCTV vuah vek tur a nih thu tun thla ni 10 khan thupek chhuahin a tarlang a. He thupek zawm lo chu Section 223 of Bharatiya Nyaya Sanhita, 2023 dan hmangin hrem theih an ni ang.

Serchhip District Truck Owners’ Association chuan nimin khan CMS Picnic Spot-ah Assembly neiin an pawl hruaitu tur thlanna an nei a, President-ah Ricky Laldingliana (AOC Veng); Vice President-ah F. Vanlaltluanga (Tuikhuah Veng); Secretary-ah Lalzidinga (Tuikhuah Veng); Asst. Secretary-ah H. Lalrinawma (AOC Veng); Treasurer-ah Zamvela (Dinthar Veng) leh Fin. Secretary-ah Lalngaihawma (Tuikhuah Veng) te thlan an ni. Serchhip District Truck Owners’ Association te hian nimin vek khan Serchhip District Hospital Poor Fund atan Rs. 10,000/- an hlan bawk a ni.

Niminpiah khan Serchhip District-a Bak\tawng khua ah African Swine Fever (ASF) vanga Vawk thi pakhat chhinchhiah leh niin nimin khan Chhuanthar Tlangnuam-ah ASF hri leng darh zel tur venna atan Vawk pakhart suat leh a ni bawk a. Heti hian kumin chhungin Serchhip District-ah ASF vanga Vawk thi 3527 awmin Vawk 7069 suat a ni tawh bawk a ni.

Kan hma lawka hunpui lo thleng tur Krismas, 2024 leh Kumthar, 2025 pualin Mizoram Governor Dr. Hari Babu Kambhampati chuan nimin tlai khan Aizawl Bishop, Most Reverend Stephen Rotluanga chu Aizawl-a a chenna, Bishop House, Ramthar Veng-ah tlawhin duhsakna a hlan.

Home Minister K. Sapdanga chuan Mizoram Police chuan ram leh hnam hmelma ruihtheihthil hluar zel tur danna atan tha thlah lo a hma a lak zel thu sawiin, Police hna thawk thei lo an awm a nih chuan a hun hmaa chawlh tir thlenga hma an lak tur thu a sawi.

BJP Mizoram chuan nimin khan Aizawl-a BJP State Conference Hall, Mipui Rûn-ah Advance Krismas hmangin kum 2024 atana Party Office kharna hun an hmang a, he hunah hian kum 70 chunglam te hnenah chawimawina leh ngaihhlutna thilpek hlan niin kum 2024 chhunga an hmalakna hrang hrangte ngaihthlak a ni bawk a, BJP State Vice President Vanupa Zathang chuan thu a sawi bawk a ni.

Mizo Zirlai Pawl (MZP) General Hqrs. chuan kum 2024 atan Aizawl-a MZP Office, MZP Pisapui kharna hun nimin khan an hmang a, he hunah hian MZP President H. Lalthiang-hlima chuan MZP Pisapui hi khar mah se Zirlaite leh Ram leh Hnam in a mamawhna zawnah chuan engtiklai pawhin hma an la reng dawn tih a sawi. MZP Office hi kumthar January 14-ah hawn leh tur a ni ang.

Mizoram sawrkar-a School Education Department chuan NGO leh pawl hrang hrang ten School Education Department hriatpui lohvin sikul naupangte pualin intihsiakna an buatsaih thin thu leh intihsiakna piahlamah programme hrang hrangah thuneitute hriatpui lova zirlaite sawm an awm thin tih hriat a nih thu sawiin, hetiang thil hi a thlen tawh lohna tur leh Department in Sikul Calendar a buatsaih mila zirlaite exam leh hun pawimawh tibahlah thei zawnga programme/activities duang lo turin pawl hrang hrangte an ngen a. Intihsiakna leh Programme, sikul naupangte puala buatsaih tur ten Department remtihna lak hmasak tur a nih thu leh Sawrkar School zawng zawngte pawh Department phalna la hmasa lova Intihsiak leh Programme dang, naupangte puala buatsaih tumte lo bengkhawn lo tura hriattir an nih thu an tarlang bawk.

MNF Senior Vice President Dr. R. Lalthangliana chuan Pathian leh mipui zarah MNF a sawrkar leh hunah Ration buhfai man leh Oil man te chu ennawn leh an tum thu a sawi.

Mizoram Congress chuan nimin khan Aizawl-a Congress Bhavan kharna leh Krismas Fellowship an hmang. Nimin-a he hun hman ah hian MPCC President Lal Thanzara chuan sawrkar-in upa zawk leh hriselna pan zawk ten hlim taka Krismas leh Kumthar an hman theih nan halpuah leh halmawi hal a khap chu Lal Thanhawla hunlai atanga bultan a ni tih sawiin, “Aizawl mipui ten sawrkar thupek hi zawm theuh turin Congress Party chuan kan sawm a ni,” a ti a. Congress Party chu Pathian in ram hruai tura a kaihthawh loh chuan kan ram hi a rum thin niin a sawi bawk. He hunah hian  AICC Congress Working Committee (CWC) Member Dr. Lal Thanhawla pawhin, “Tunah hian Politics a inlumlet nasa hle a. Eng hunah nge kan inthlan dawn a hriat loh a, inring renga awm mai tur a ni,” a ti bawk.

All Mizoram Village Council Association (AMVCA) in Village Council term pawh tawi chungchanga Gauhati High Court-a Mizoram sawrkar an khinna chu kumthar-a High Court hawn a nih veleh ngaihtuah a ni dawn.

Mizoram Governor Dr. Hari Babu Kambhampati chuan Assam Rifles sipai zinga hna thawk tha zual thlanchhuah mi 35 te hnenah nimin khan chawimawina tangkapui, Governor's Gold Medal 15 leh Silver Medal 20 a hlan.

Mamit District a awm Thorang Wildlife Sanctuary chhunga Dampui ‘S’ khua a cheng chhungkaw 6-te hnenah an insawnchhuahna tur sum ruahman thawh khatna chu nimin khan Forest Minister Lalthansanga chuan a Pisa-ah a hlan.

Bunghmun RD Block kum 50 tlinna, Golden Jubilee lungphun chu niminpiah khan Rural Development Minister Prof. Lalnilawma chuan a hawng.

District Institute of Education and Training (DIET) Serchhip buatsaih Serchhip District Middle School Quiz Competition, 2024 chu nizan hmasa khan zawhfel niin Final-ah Little Flower Convent School, Serchhip leh Presbyterian English School, Baktawng te inhmachhawnin zawhna 28 ve ve zawh an ni a.PES Baktawng hian point 210 hmuin pakhatna an ni a, lawmman ah Trophy leh Rs. 15,000/- dawngin pahnihna LFCS te hian Rs. 10,000/- an dawng bawk a ni. He Quiz Competition hi DIET Serchhip Principal Jane Vanlalmuanpuii chuan hmanpuiin lawmman te a sem nghal bawk a ni.

 

 

New Serchhip in kum 50 a tlin lawmna chu nimin khan neih a ni a, he hun hi Chief Minister leh Bialtu MLA Lalduhoma chuan hmanpuiin New Serchhip Golden Jubilee hriatrengna lungphun chu a hawn bakah Jubilee Souvenir an buatsaih chu a tlangzarh bawk a ni.

Serchhip District chhunga damdawi zawrh phalna, Drug License neitute tan nimin khan damdawi zawrh chungchanga hriat tur pawimawh inhrilhhriatna neih a ni.

Krismas leh Kumthar lo thleng turah boruak muanawm tak a awm theih nan Serchhip-a Excise & Narcotics Department chuan December thla atanga kumthar January 3 thleng khian ‘Special Drive Programme’ an duang a, hemi chhung hian Mobile Patrolling neih a ni anga, Breath Analyser hman thin a ni ang. Excise & Narcotics-te hian Serchhip District chhunga khaw tin an tlawh dawn a, dan bawhchhia te chu an chungah dan anga hma lak a nih tur thu Serchhip District Bawrhsap Paul L. Khuma chuan hriattirna a chhuah a. Krismas leh Kumthar hun chhunga thil thalo thleng, Excise & Narcotics Department hnena thlen te chu Asst. Commissioner of END rawn chungin hmalak thin a ni dawn bawk a ni.

Mizoram sawrkar in kumin atana School Calendar a siam angin Vawiin, December 13, 2024 hi kumin atana zirna In hrang hrang hawn ni hnuhnung ber a ni ta a, zirna In hrang hrangte chuan naktuk, December 14, 2024 atang hian Thlasik chawlh an hmang tan dawn a ni. Sawrkar in December 19, 2023-a thuchhuah a lo siam tawh angin zirna In hrang hrang, Primary School atanga Higher Secondary School te chu nakum January 10 (Zirtawpni)-ah hawn tan leh an ni dawn a ni.

North Vanlaiphai Higher Secondary School NSS Unit te chuan damlo ten an mamawh huna an hman tura Blood Bank-a dah turin nimin khan thisen Unit 8 an pe a, thisen petute hi mipa leh hmeichhia pali ve ve niin heng mi tlawmngai te hi thisen pe turin Serchhip Blood Bank-ah an rawn kal a, Blood Bank-a thawktu ten an thisen hi an lo lak sak a ni.

Serchhip Chemist & Druggists Association chuan nimin khan kum 2025 chhunga an hruaitu tur thlanna neiin President-ah V. Laldinliana; Vice President-ah Benjamin K. Zothanliana; Secretary-ah John Lalruatsanga; Asst. Secretary-ah Johny Lalchhuanmawia; Treasurer-ah Chawngthan-sangi (Maseni) leh Finance Secretary-ah Laltlankimi (Atlani) te thlan an ni.

Mizoram College Teachers' Association (MCTA) Annual General Conference vawi 45-na chu nimin khan Govt. Hnahthial College-ah neih a ni a, MCTA-ah hian sawrkar College 24 leh Posted Outside College atangin member 597) an awm mek a. MCTA member ni lo Zirtirtu 307 awm bawkin an vaiin Zirtirtu 904 an awm mek a ni.

November thla tawp thleng khan Mizoram ah lirthei inziaklut 3,23,083 a awm a, lirthei inziaklut zingah hian lirthei ke pahnih nei tam berin 2,22,023 a awm a, Car 53,699 awmin a tam lamah a dawt a, bungraw phur chi 23,096 inziaklut an awm bawk. Transport Department in a tarlan danin Mizoram chhungah Taxi tlan mek 5,856 awmin, Two Wheeler Taxi 4,126 leh kar kawnga zin chi Maxi Cab 2,390 inziaklut an awm a ni. Nikum 2023 leh kumin November chhung khan lirthei inziaklut zat hi 40,063 in a pung a ni.

Mizoram Governor Dr. Hari Babu Kambhampati chuan nimin khan Raj Bhavan-ah Mamit leh Kolasib District-a Oil Palm Growers Association hruaitute kawmin India-in hriak ei chi (edible oil) a mamawh tam zawk ram dang atanga a lakluh thu leh intodelh tura theihtawp a chhuah thu sawiin, Sawrkar laipui chuan National Mission on Edible Oils-Oil Palm (NMEO-OP) kaltlangin Oilseed tam zawk thar turin tan a la chhunzawm zel tih a sawi a. Mizoram chu Oil Palm thar tamna leh hriak ei chi kan lakluh tamna Malaysia anga theihna nei a nih tih sawiin, hemi kawngah hian theihtawp chhuah a tul thu a sawi bawk. He hunah hian NMEO-OP kaltlanga kum 2022-2024 chhunga Oil Palm hralhtute hnena sawrkar laipui in engemaw rokhawlhna avanga Viability Gap Payment tun thlenga a la pek theih loh chungchang Oil Palm Growers hruaitute'n an thlen chu Larsap chuan hma lak sakin, Sawrkar laipuia hemi buaipuitute pawh a biak sak nghal a ni.

Mizoram Sericulture Service Association (MSSA) Inkhawmpui vawi 41-na chu nimin khan Directorate Conference Hall, Chaltlang-ah neiin Sericulture Minister Lalthansanga chuan a hmanpui a. Khawvel in Silk a ngaihhlutzia te, India hmarchak bikah chuan Mizoram chu Silk pangang eng chi pawh hlawhtlinpui tham thar theihna hmun a nih thu sawiin, Parmanent Farming hlawhtlin theih nan Sericulture chu Mizoram tan lungphum pawimawh tak anih thu leh chumi hlawhtlin theihna tur chuan Department chhunga thawktute chuan mawhphurhna sang tak an neih thute a sawi a ni.

Mizoram Lok Sabha MP Richard Vanlal-hmangaiha chuan Manipur buaina chungchangah Sawrkar laipui chu remna palai-ah tanga Community pahnihte dawhkan khat kilpuia an harsatna chinfel dan tur sawipui turin a phut thu nimin-a Lok Sabha Inkhawm ah a sawi a, Manipur-a buaina hian a awh rei ta hle tih sawiin, mi 200 chuangin nuna hlu tak an chan tawh bakah mi sing nga chuangin In leh lo chanin Kristiante Biak In 300 chuang zet hal a ni tawh tih a sawi a. Sawrkar laipui tan mahni ramchhung ngeia buaina thleng hi a chinfel dan ngaihtuah a hun ta hle tih sawiin, “Pathian in nunna hlu tak min pek hi kan zah tur a ni a, he buaina chinfel dan kawng tha zawk ngaihtuah thuai a nih loh chuan nunna tam zawk kan chan belh zel dawn a niin a lang,” a ti a. Tun dinhmunah chuan Sawrkar laipuiin Paramilitary Force tam tak pawh tir lut mahse heng Community pahnihte inkara inremna a awm chuan si loh chuan an harsatna hi sutkian tak tak a nih a rinawm chuang loh tih sawiin, “Chuvangin Central Sawrkarin Community...

Mizo Zirlai Pawl (MZP) Hqrs. Mamit chuan tawng theilo leh Bengngawng anga insawi-a kutdawh, S. Ravi Kumar Hyderabad nia insawi chu nimin khan a document te enfiah sakin a lem tih hmuhchhuah a nih avangin Police kutah an hlan a. Hetiang mi hmu te chuan thuneitute hnena hrilh vat thin turin an ngen bawk a ni.

Thingsai Agri-Farming Cooperative Society enkawlna hnuaia PACS chu nimin khan hawn a ni.

Mizo Inchai Title Fight 2024 chu nizan hmasa khan neih niin Palian Champion lai Lalsangliana chuan Lalrinchhana Sailo hnehin a Title a humhim a ni.

Champhai Chhangphut Field Stadium-a Flood Light vuah thar chu nizan hmasa khan Chief Minister Lalduhoma chuan a hawng.

Kumin January thla atanga November, thla 11 chhung khan Mizoram Police leh Excise & Narcotics Department hnathawkte chuan ruihhlo chi hrang hrang tam tham tak an man tawh.

Mizoram Consumers' Union (MCU) Annual General Meeting vawi 27-na chu nimin khan neih niin Governor Dr. Hari Babu Kambhampati chuan khuallian niin a hmanpui a ni.

Nimin khan Serchhip SP Conference Hall-ah kumin chhunga Serchhip District chhunga Police te an hna thawh that avanga chawimawina leh Krismas leh kumthar vuakvet lo thleng tur atana infuihtharna neih a ni a. Kumin chhung hian Serchhip District chhunga Police te hian thubuai 187 an ziaklut tawh a ni.

Serchhip Town Land Committee chu nimin khan an Chairman leh Bawrhsap Paul L. Khuma hova thukhawmin Kohhran leh mimal ram dilna lut hrang hrangte an thlirho.

Thenzawl Civil Sub-Division huamchhunga mipuite hnen thleng phaka Department hrang hrang ten hna an thawh theihna tur 'Fehchhuah Programme' chu nimin khan Neihloh khua ah hman a ni a, mipuite dawr theih turin Department leh Office hrang hrangte an inphochhuak a ni.

Serchhip Police te chuan nimin khan Ser-chhip khawpui chhung hmun hrang hranga Dawr te enfiah lehin dan in zawrh a phal loh Halpuah leh halmawi bakah Silai lem, a mu nei chi lo kawl leh zuar an awm leh awmloh te an enfiah a, he hunah hian Dan bawhchhiaa hetiang thil lo zuar manchhuah awm lovin mipui ten sawrkar thuchhuah an zawm tha viau nia an hriat thu Serchhip Police Station-a thawktute chuan an sawi a. Sawrkar in heng halpuah leh halmawi te hi a khap mek angin lo kawl-a lo zuarchhawng lo tur leh hmang lo turin mipuite chu an ngen bawk a ni.

Serchhip District chhunga Baktawng khua ah nimin khan African Swine Fever (ASF) vanga Vawk thi pakhat chhinchhiah belh leh a ni a, tun thla ni 3-a New Serchhip South-a Vawk thi chhinchhiah a nih hnuah ASF vanga Vawk thi chhinchhiah leh hmasak ber niin kumin hian Serchhip District-ah ASF vangin Vawk 3526 a thi tawh a ni. Hetihlai hian Serchhip District Magistrate Paul L. Khuma chuan nimin, Dec. 11, 2024 khan Section 163 of Bharatiya Nagarik Suraksha Sanhita, 2023 tlawhchhana thupek chhuahin Serchhip District chhungah ramdang atanga Vawk, Vawksa leh Vawksa atanga siam eitur reng reng lakluh khap a nih thu a tarlang a. District chhunga khua leh khua te pawh Vawk an inlak pawlh dawn chuan ran hrisel a ni tih VC ten an hriatpuina lak a ngai bawk a ni.

Aizawl District Congress Committee chuan nimin khan Aizawl Congress Bhavan-ah Media Training neiin he hun hi MPCC Treasurer Dr. Lalmalsawma Nghaka chuan a hmanpui a. “Media zahawm tak hi ram hruaituten thudik tawk lo leh thu belhchian tawk lo sawi mai mai nan an hmang thin hi a pawi hle, kan ram mipuite hian thudik tak an hriat hi an dikna chanvo a ni tih hre nawn se ka duh hle a ni,” a ti bawk.

Mizoram AAP hruaitute chuan nimin khan National Institute of Technology (NIT) Director Prof.S. Sundar chu hmuin tunhnaia Faculty an lak thar turah ram leilung fate'n hamthatna an neih ve ngaih pawimawh sak tura an ngen bakah induhsak bikna awm lo se an duh thu an thlen a, thil fello a awm a nih chuan hma an lak chhunzawm tur thu an hrilh bawk tih thuchhuah siamin an tar-lang. AAP hruaitute chuan Mizoram a kan zirna pawimawh NIT chu Mizoram Sawrkar pawhin ngaihsak se, Campus tha tak an neih vat theih nan an harsatna chinfel sak turin an ngen thu an sawi bawk.

MNF Thalaite chuan Mizoram Rajya Sabha MP K. Vanlalvena chenna Quarters Tuikhuah-tlang-a motor a dahna Garage-ah ZPM Contractor pakhat chuan thuneitu sang zawk atanga thu hmu anga insawi in Toilet sak tumin hna an thawk tih thuchhuah siamin an tarlang a. “MP te hi VIP an ni a, an chenna atanga chhuak tur leh khawih danglam tur a nih chuan Official in hriattir thin an ni a, engmah hrilhlàwkna awm lova hetiang a hma la a hna an thawk ta mai hi MNYF chuan mak kan tiin kan dem takzet a ni,” an ti. MNYF chuan Legislator's Home-ah hian Electric Short vangin Chimney a chhe vek nia sawi bawkin, Rajya Sabha MP tih loh Quarters dang luahtu zawng zawng a thar pe vekin Rajya Sabha MP chiah an pe ve lo niin an sawi bawk.