Thil pathum lek!

- Zonuna Kawlni

May 4 atanga 15, 2023 chhung khan Mizoram-a Chanchinbu mi thenkhat te chu Delhi bakah India hmarlam hmun thenkhat, Nainital, Ramnagar, Dehradun, Mussoorie, Manali leh Shimla te tlawh turin kan zinchhuak a. State leh khawpui hrang hrang ten hmasawnna an neih tam tak zuk hmuin hmasawnna tura pawimawh hrang hrang nia kan hriat te rilru ah cham reng a awm zui bakah India rama ramngaw leh thing leh Mau hausakna zirbingna leh an vawnthatna bakah Forest Officer lian te Training-na hmun ni bawk Dehradun-a Forest Research Institute (FRI) leh India rama nungcha chi hrang hrangte chanchin zirna leh an nihna hrang hrang vawnthatna hmun, Wildlife Institute of India (WII) Dehradun te kan tlawh bawk a. Heng-a kan thil hmuh leh rual awhna te sawi vek sen ni lo mah se kan zinna a kan thil hmuh atanga ngaih pawimawh zui tlak nia ka hriat thil pathum (3) lek i han tarlang teh ang.

Heng khawpui hrang hrang kan tlawh te hi tlangram te a nih avangin lirthei hmangin kan kal nasa a, kan kalna hmun hrang hrang ah hian ramngaw tha tak tak hmuh tur a tamin kawngpui kama thingkung tha tak tak, kum upa tawh leh zai tham tur tam tak hmuh tur a awm a. Hmun thenkhat ah chuan an thing te hi kum bithliah siamin phun thar te, a thang lai leh enkawl mek bakah zai theih tur khawpa puitling tawh te mumal taka ruahman a ni bawk. Keini ramah erawh kan hriat angin a rukin thing kan zai nasa hle a, zai tham dek dek, Uipum tia ti-a kan sawi chu khawl nen luhchilhin kan zai nghal zel a ni ta mai a, hetiang renga kan kal a nih chuan kan thingzai mamawh hi nakin lawkah chuan kan hmu phak lo mai dawn ni te pawhin a lang.

Hei vang hian sawrkar leh mipui, khawtlang-a roreltute thleng hian kan thingkung neih te enkawl dan kawng thar hi kan zawn ve a ngai ta niin a lang a. Kum 20/30 vel-a zai tur thing kan neih zel theih turin kum 5/10 dan zela thingtiak kan phunna tur te, kan enkawl zui tur leh ruahmanna tha tak hnuaia kan mamawh tur kan zaichhuah theihna tur hmun te hi kan thliar fel a hun ta hle a ni.

Hei mai bakah hian kan ram-a Lo vat thin ten kawngpui kam thlenga kan vat dar vek zel thin hi sim a hun ta hle niin a lang bawk a, ramhnuai ah kawng atanga ft. 10 vel tal hi chu vat dar lo hian zuah thei zel ila, hei hi khualzin veivak te tan pawh kan ram ti nuamtu a ni thei dawn bawk a. New Delhi-ah thing tam tak phun a ni chunga boruak a lum tawh dan mitthla chungin tun atanga thingphun kan tan loh chuan nakin lawkah chuan khawpui chhung vawng nuamtu tur thing phunna tur pawh hi kan nei lo thuai dawn ni te pawhin ngaihdan a awm thei awm e.

Kan zinna ah hian Ramnagar-ah zankhat riakin ‘Corbett Tiger Reserve’ ah Sakei hmuh beiseiin Gypsy Safari an tih ah kan kal a, Sakei erawh kan hmu ta chiah lo chungin an ramngaw humhalh chhungah Gypsy hmangin thui tak kan tlan a. Hetiang hi Sakei leh ramsa dang humhalhna hmun hrang hrangah kalpui niin kan kalna ah ringawt pawh hian motor 30 vel zet a kal a, kan kalna chauh ni lo hian helai hmun ah hian Gate 8 vel a awm ni awmin an sawi a, ni tin Motor 30 leh a aia tam te an kal niin an sawi bawk.

Kan ram ah hian ramngaw tha tak tak leh nungcha hmuhnawm tak tak, sawrkar leh khawtlang hmalakna a uluk taka humhalh te pawh kan nei a, hetiang leilung hausakna humhalh avanga sum lakluh dan kawng hi kan zawn ve a pawimawh hle mai. Kan ramah khualzin tam zawk kan huiluh theihna turin ramngaw leh nungcha te ti chereu si lovin hetiang hi Dampa Tiger Reserve-ah te emaw, kan ngaw humhalh dang ah te emaw hian han siam ta ila, khualzin te chauh ni lovin Golf Course leh Dilpui te tlawh tuma kal luih luih thin Mizo mipuite hian kan hlut hle in a rinawm a ni. Chumi atan chuan kan ramngaw, thing leh Mau leh nungcha te nasa zawka humhalh erawh mitin ten tun aia kan ngaih pawimawh a tul dawn a ni.

Sawi tawh angin tlangram-a kal kan nih avangin luidung hrul a kawngpui-a thui tak tak tlan chang te neiin khawchhunga lui luang te pawh a kam lawkah thui tak tak kan tlan a, an luidung an enkawl faiin luidung hausakna, a bikin Lung leh GSB kan tih mai te hmuh tur a tam em em a ni. Tunhnaiah kan rama kawngpui siam avangin khaw tam takin an ramchhunga luidung-a lung leh GSB lak nasat an buaipui niin a lang a, kan hmuh tam berah chuan khawchhung a luidung-ah pawh lung tha tak tak hmuh tur a tamin lung lakna hnuhma awm a vang hle mai. Heng luidung hausakna kan sawi te hi kan lui-a tui ti tamtu, luidung nungcha te khawsakna hmun a ni tih hre thar ila, heng te hi tha taka kan humhalh loh chuan nakin lawkah chuan kan luidung nungcha te hi an rem mai dawn niin a lang. Tin, an khawpui chhunga lui luang kan hmuh tam tak te hi an enkawl fai em em a, Sarang lam chi te hmuh tur a awm ve lem lo, kan entawn atan thil pawimawh tak a ni awm e.

Pathian in Mizote tan Mizoram min pe a, chumi chhungah chuan kan ram sik leh sa mil turin thing leh mau, nungcha leh leilung hausakna chi hrang hrang min pe bawk a, heng te hi a chhunga chengte hian uluk tak leh duat taka kan enkawl hi a pawimawh khawp mai. Ramdang atanga thing leh mau leh nungcha kan lakluh te hi tha zawk leh hlawk zawk pawh a awm thei a, chutih rual erawh chuan heng te hi a ram leilung in a kentel, Pathian in awm tura a dah te dipraltu leh tichhetu a ni zawk thei niin a lang. Hei vang hian Pathian in kan ram-a awm tura a dah thing leh mau leh nungcha te humhalh leh vawnhim hi i ngai pawimawh thar zel ang u.