Mizoram-ah Dan lova ramsa lakluh man tam tawh; Tam Dil chu Ramsar Site-a puang turin hmalak mek a ni

Sakawrtuichhun-a Aizawl Zoological Park-ah dan kengkawhtu hrang hrangte'n rampawn atanga dan lo-a lakluh an man ramsa 995 dah mek an ni a. Hetihlai hian Mizoram-a Dil hmingthang Tam Dil chu Ramsar Site a puan a nih ve theih nan hmalakna kalpui mek a ni bawk.

Principal Chief Conservator of Forests (PCCF) RK. Singh-a sawi danin Mizoram chhunga dan loa ramsa phurhluh Custom Department ten an man chu Forest Department hnenah an hlan chhawng leh thin a, an Department hian Aizawl Zoological Park-ah enkawl turin an dah leh chhawng thin a ni. Heng dan loa ramsa phurhluh te hi Mizoram-a awm ngailo an nih avangin enkawl a harsa a, an thil ei te leh hri an kai em tih te enfiah a ngaih thin avangin training pawh neih thin tih PCCF chuan aa sawi a. Ramngaw leh nungcha humhalh kawngah tlawmngai pawl hrang hrang te nen an thawkho thin tih sawiin, mipui hnena thil hrilh hriat kawngah an tangkai a, Department nen tha takin an thawkdun tih a sawi a, Sawrkar laipui hnuai ami Rescue Centre Champhai District ami chu heng dan loa lo lut te enkawl kawngah tangkai taka hman a ni dawn tih a sawi bawk.

Mizoram-ah July 7, 2019 khan dan loa ramsa lo lut hmasa ber chu man a ni a, Court-in Aizawl Zoological Park-ah dahin tun thlengin ala awm a, ramsa te hi Mizoram chhunga District 5-Champhai, Aizawl, Khawzawl, Mamit leh Kolasib ah te man tawh an ni. An man tam ber chu Champhai District-ah niin 679 man a ni a, a tam zawk hi Asia khawchhak lam ram atanga Myanmar kaltlanga tawlhruk nia hriat a ni.

Principal Chief Conservator of Forests RK. Singh chuan Mizoram-a Dil hmingthang Tam Dil chu Ramsar Site-a puan a nih ve theih nan hmalakna kalpui mek a nih thu leh hei hian Tam Dil leh a chhehvela ramngaw humhalh kawngah nasa takin hma a sawn phah dawn tih a sawi bawk a. Nikum July thlaa Ramsar Site a puan tak Siaha District chhunga Pala Dil leh a chhehvel (Pala Wetland) chu Ramsar Site-ah puan anih hnuin a humhalh kawnga hmalakna senso hrang hrangte sawrkar laipuiin a rawn tum tawh a, hei hi State tan chhenfakawm tak niin humhalh kawngah pawh nasa zawkin hma a lak tir thei niin a sawi bawk.

Nikum July ni 26 khan Pala Dil leh a chhehvel (Pala Wetland) chu India ram hmun dang a Wetland pali (4) te nen khawvel pum a Wetland pawimawh bik - Ramsar site-a puan a ni a. Hei hi thil chhinchhiah tlak bik leh Mizoram-a a vawikhatna a nih avangin ramngaw leh nungcha humhalhna kawngah rilru thar leh phurna thar put tirtu a neih ngei a beisei thu PCCF chuan a sawi.

Wetland hi hmun hnawng, tuiin a chim reng emaw, a chim fo thin tihna a ni a. Thing leh mau leh nungcha tinrengah an hausa in tui hna siam leh tih thianghlim kawngah an thawhhlawk hle thin a. Mizoram hian hetianga hmun hnawng (Wetland) hi kan nei nual a, tunah hian Wetland pahnih – Tamdil leh Pala te hi State Board for Wildlife kaihhruaina hnuaiah a chhehvel mipui te nen tangho in Environment, Forests & Climate Change Department (EF&CC) chuan a enkawl mek a ni. Wetland hi a pawimawh em avangin EF&CC Department chuan a tam thei ang ber enkawl leh humhalh turin tan a la mek bawk a ni.

Comments

Popular News (Last 30 Days)

LPG man bithliah thar