Zo Hnam inpumkhatna kawngzawh neih a ni

Zo Reunification Organisation (ZoRO) bultumin Inrinni khan Aizawl-ah ‘Zo Hnam inpumkhatna kawngzawh’ neih a ni.

He kawngzawh hi Aizawl Millenium Centre kawt atanga Aizawl Vanapa Hall kawt thleng neih niin ZoRO Thalai President Zohmingthanga chuan a kaihruai a, Kawng zawhna ah hian "Kan unau te tawrhna hi kan tawrhna a ni” tih te, “Zofaten enge kan duh? Insuihkhawm” tih te in au rualna neih a, Zo Hnam inpumkhatna duhtu kum upa lam leh thalai thahnem tak an tel a ni.

Zo Hnam inpumkhatna kawngzawh kharna Vanapa Hall kawt a neih ah ZoRO General Secretary L. Ramdinliana Renthlei chuan Zofate hi khawchhak atangin thlang kan tla a, thlangtla hmasa leh hnuhnung kan awm a, kan tawng leh nihphung te pawh lo danglam tawh mahse Zofate chu unau vek kan ni tih sawiin, “Pathian in a ruatsa, thisen a inzawm kan ni,” a ti. He kawngzawh a telte hian Resolution 4 pass in Zofa hmun hrang hranga awmte an insuihkhawm leh theih nan, an awmna hmun apianga theihtawp an chhuah zel dawn thu te an tarlang a ni.