Zirlaite enkawlna dan siamthat a ngai - Lalsawta

Mizoram Pradesh Congress Committee (MPCC) President Lalsawta’n sawrkar chakna hmanga zirlaite enkawl dan thar (reforms) siam a ngai tih sawiin, “Mipuiin Sawrkar School aia Private School an thlang tlat thin hian sawrkar tan siamthat tur a tam tih a tichiang hle a ni,” a ti.

National Student’s Union (NSUI) Mizoram in kumin-a Pawl 10 leh Pawl 12 Topper te lawmpuina hun nimin-a Vanapa Hall-a an buatsaih a hmanpuinaah MPCC President chuan Congress Party chuan ‘Reforms’ ngai tam tak zingah an ngaih pawimawh a nih thu a sawi a. Mizoram-ah tunhma zawng aiin thalaite chu khawvel ram dang thalaite nen tual khat-ah an cheng za ho ta lehzual tih sawiin, mi tam takin Mizoram chhung maia thawk tura an rilru an lo neih thin pawh thlakin India ram leh khawvel huap pawha thluak inelna kawngah an inbuatsaih a, intahhriam a ngai tih a sawi a. He huna zirlai kalkhawm te chu tumna a awm chuan khawvel inelna ah a titha ber an nih theih thu in hrechiang a, khawvel hneh thei tura rilru inbuatsaih turin a chah a.

MPCC President chuan Politics chu ram leh mipui tih hausakna tur a ni tih sawiin, Mizoram hian tih takzet a ram tana thawk tur a mamawh a. Politics hi mimal hausakna tur nilo in, ram leh mipui tih hausakna hmanrua a ni tih hriaa tun atanga fim taka hun lo la kal tur siamtu an ni tih hria a inbuatsaih sauh sauh turin zirlai kalkhawmte a fuih a ni.