NITI Aayog Governing Council Meeting-ah Chief Minister in Mizoram mamawh te a thlen

NITI Aayog Governing Council Meeting chu Inrinni khan New Delhi-a New Convention Centre, Pragati Maidan-ah neih niin he huna tel Chief Minister Zoramthanga chuan Mizoram mamawh te a thlen a, Chief Secretary Dr. Renu Sharma chuan a tawiawm a ni.

He Meeting hi NITI Aayog Chairman leh Prime Minister Narendra Modi chuan kaihruaiin Chief Minister Zoramthanga chuan Sustainable Development Goals Index 3.0 ranking chhuah hnuhnun berah State hma la tha 15 zingah Mizoram chu 12-na a nih thu tarlangin, Mizoram chu SDG hlawhtlinna tehna atana Local Indicator framework hmanga Village Level leh Local Level-a hma la hmasa ber State-te zing ami a nih thu a sawi a. Hemi kaihhnawihah hian Ngopa Village Council chu an thawh that avangin ‘Best Gram Panchayat Award in 2023’ pek a nih thu a sawi bawk. Mipui hamthatna turin leh a bik takin mahni kutkawih a eizawngte puih a tihhmasawn nan State Flagship Programme SEDP kalpui mek a nih dan Chief Minister chuan a sawi bawk a. An eizawnna chawisan a nih a, an sum lakluh a lo tam zawk nan Trade 52 lai ah Incentive pek a nih dan te a sawi a ni.

Chief Minister chuan State pum hmasawnna atana hmasawnna ruhrel lian tak tak din ngaihpawimawh a nih thu leh hemi ah hian inkalpawhna lama hmasawnna - Rel kawng te, National Highway leh a dangte chuan sumdawnna leh a kaihhnawih dangah hmasawnna a thlen tel zel tur thu a sawi a. Hmasawnna ruhrel daihrei tur dinna atana sawrkar laipuiin SASCI (Special Assistance to States for Capital Investment) Scheme a duang chu lawmawm a tih thu pawh sawiin, State te'n tangkai zawka kan hman leh theih nan he Scheme hnuaia Part-I a kaihhruaina a inziak thenkhat chu a aia khirhlo zawka siamthat ni se tiin rawtna a thlen a. Hei bakah hian sawrkar laipui Scheme thenkhat hnuaiah Land Acquisition atana a hranpa a sum dah a nih loh avanga harsatna awm thin chu sutkian nise tiin a thlen bawk a ni.

Sawrkar hmalakna leh bultum ngawr ngawr chuan hmasawnna hna zawng zawng a thawh theih vekloh avangin Private Investment uar tura hmalak zel a nih dan Chief Minister chuan sawiin, Mizoram chu Ministry of DoNER in North East Global Investors' Summit a kalpui mekah pawh phur taka hma a lakpui thu a sawi a. State chhunga Healthcare infrastructure in duhthu la sam tawk lo mahse Mizoram chuan naupang 100% ah Rotavirus hri danna a pekchhuah tawh thu leh ram chhunga Infant Mortality Rate hniam ber a nih thu a sawi a. Lawngtlai Siaha, Serchhip leh Mamit District Hospital te chu tihchangtlun a thuamthat mamawh a nih dan te, Community Health Centre-te chu First Referral Unit ni tura tihchak a pawi-mawhna te thlenin, Hmeichhiate dinhmun chawikan kawnga Mizoram in hma a sawn dan te a sawi a. District tina Working Women Hostel sakna tur sum pek mamawhna te sawi bawkin, sumdawng hmeichhia te'n an hman tangkai tur nau enkawlna (creche) siam tul thu bakah Mahni sahimna zawnga Mizoram-a raltlan te dinhmun leh State sawrkar leh mipuiin an lo dawnsawn dan te a sawilang bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar