Hnam inpumkhat leh inlungrual kan nih zel theih nan ZoRO hmalakna thlawp a tul - I&PR Minister

Information and Public Relations Minister Lalruatkima chuan, “Hnam inpumkhat leh inlungrual kan nih zel theih nan ZoRO hmalakna hi kan thlawp a, a tul anga kan lo tawiawm hi a pawimawh hle a ni,” a ti.

Zo Reunification Organisation (ZoRO) buatsaih Zofate khawmpui Lian nimin a Aizawl Vanapa Hall-ah neih a hmanpuina ah I&PR Minister Lalruatkima chuan ZoRO in Zofate inpumkhata kan awm theihna tur atana hmalakna nasa tak an nei chu a lawmawm takzet tih sawiin, Pathian in Zofate hi hnam anga dinchhuah tir a, leilung hausakna a la thuhruk pawh a neitu tura a tih te hi a la phawrhchhuah tir ngei ang tih a sawi a, chumi tur erawh chuan Zofate hi inlungrual a, hrui khat vuanin, hnam dangte mit hmuhah pawh hnam inlungrual kan ni tih lantir a ngai tih sawiin, “Hnam inpumkhat leh inlungrual kan nih zel theih nan ZoRO hmalakna hi kan thlawp a, a tul anga kan lo tawiawm hi a pawimawh hle a ni,” a ti.

Zo hnam chi hrang hrangte hmun hrang hrangah awm darh mahila kan inhre rengin kan inngaihsak thin tih I&PR Minister chuan sawiin, tunhnaia Zohnahthlak unaute buaina tawh chungchangah pawh Mizoram a raltlan te chu sawrkar leh tlawmngai pawl hrang hrang ten an lo tuamhlawm tih a sawi a. Manipur atanga raltlan, UPSC exam hmachhawn turte tan pawh Aizawl Centre-ah thlamuang taka an exam theih nan ruahmanna siam sak an nih thu a sawi bawk.

Lalruatkima chuan Zofate identity chu rinawmna, huaisenna leh tlawmngaihna a ni tih sawiin, “Khawi hmunah pawh awm ila, kan hnam rohlu vawng nung zel tur hian Zohnahthlak zawng zawng ten mawh kan phur a ni,” a ti a. Zofate inpumkhat nan theihtawp chhuah a, ralthuam chelek loa kan thiamna leh finna hmanga tanlak zel a tul tih sawiin, kan hnam a boral loh nan kan zavaiin kan pawimawh a ni tih hre thar leh theuh turin mipuite a chah bawk.

ZoRO hi Zofa thendarha awm tawhte insuihkhawm leh rorelna pakhat hnuaia awm tura beitu a ni a. May 19-21, 1988 khan 1st World Zo Convention chu Champhai khawpuiah an lo huaihawt tawh a. He khawmpuia palai kal te khan ‘Zo’ tih chu hnam pumpui kohna atan an pawm tlang a, Zofa thendarha awm tawh te insuihkhawm leha rorelna pakhat hnuaia awm tura beih chu lungrual takin an pass a ni. ZoRO hruaitute hian ram hrang hrangte dawrin UNO khawmpui hrang hrangah te an lo tel tawh thin a, heng inkhawmpui lianah te hian Zofate inpumkhatna thu hi an aupui a, ziakin vawi tam tak an thlen tawh a ni.

Zofa Inkhawmpui Lian hi ZoRO Vice President Rohmingthanga Kawlni chuan kaihruaiin MUP, MHIP, MSU, MZP leh YMA aiawhte bakah ZORO President R.Sangkawia te pawhin thu an sawi a ni.