CADC CEM atan Rasik Mohan Chakma lalut

Chakma Autonomous District Council (CADC) Inthlanpui vawi 11-na neih zawh a nih hnuah CADC Chief Executive Member (CEM) atan MNF atanga thlantlin Rasik Mohan Chakma chu nimin khan rinawmna thu tiam tira lakluh a ni.

CEM thar lakluh inkhawm CADC Art & Culture Hall, Chawngte-a neih hi CADC-a Executive Secretary Pronit Bikash Chakma chuan kaihruaiin CEM atana Rasik Mohan Chakma ruatna sawrkar notification chu a chhiar chhuak a. Hemi hnu hian Lawngtlai Additional DC Abraham Beirazi Khithie chuan CEM hi rinawmna thu tiam tirin a la lut a. CEM thar Rasik Mohan Chakma hian thu a sawi bawk a ni.

CADC Inthlanpui 2023 neih zawh takah khan MDC bial 20 awm zingah Mizo National Front (MNF) Party chuan Seat 10 lain a hnua party dang atanga lut nen MDC 15 an nei tawh a. MNF Legislature Party dina sawrkarna siamin, May ni 23, 2023 khan CADC-a MDC tharte lakluhna hun buatsaih a nih hnuah CEM atana an thlan 1-Borapansury MDC Constituency atanga thlantlin Rasik Mohan Chakma hi lakluh a ni ve leh ta a ni. Rasik Mohan Chakma hi CADC-ah MDC atana term 6 thlantlin a nihna niin tum 5 lai CEM hna chelh tawh a, kum 2003 MLA Inthlanpuiah khan Tuichawng bial atangin MLA atan thlan a lo ni tawh bawk. CEM thar hian nimin khan a Pisa a luah nghal a ni.