Minister in thawktute kawm

Rural Development (RD) Minister Lalruatkima chuan nimin khan Lawngtlai tlawhin District Rural Development Office (DRDO) leh Block Development Office (BDO)-a thawktute nen inkawmna an nei.

RD Minister chuan RD Department hnuaia thawktute inpekna leh thawhrimna avang leh mipuite nena thawhhona tha tak avangin Mizoram chu India ramah Scheme leh Project titha berte zingah a tel tih sawiin, lawmawm a tih thu a sawi a. RD Minister a nih hnuah kum 4 chhungin MGNREGS-ah ni 100 inhlawhna an siam zat zat thei tih sawiin, kumin kum tharah pawh ni 100 inhlawhna siam leh theih beisei a ni a, kum 5 chhungin ‘Ni 100 inhlawhna’ tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu a sawi bawk.

RD Department hnuaia Scheme hrang hrang kaltlangin Mizoram hmun hrang hrangah, thingtlang kilkhawr ber thlengin hmasawnna ruhrel tam tak din niin tuihna humhalh leh tihpun kawngah te, faina leh thianghlimna kawngah leh mipuiin eizawnna ngelnghet an neih theih nan te hmalakna kalpui niin hmasawnna hmuh tur tam tak a awm tih a sawi a. Office building leh thawktu quarters thar sak belh a nih bakah thawktute hamthatna hrang hrang pawh ngaihtuah niin hmasawnna tam tak a awm tih a sawi bawk.

Minister chuan RD Department-a thawktute chu anmahni dawrtute'n an hriatthiam loh leh an hriat duh te dawhthei taka lo hrilhfiah a, miretheite innghahna leh tlukluh ngamna nih tum zel turin a chah a. Sawrkar hnathawkte tan Social Media hman dan thiam a pawimawh tih sawiin, thawktute chu an thiamna tuaihriam zel tur leh tha zawka hna thawh tum zel turin a chah a ni.

RD Minister hian Vawiin hian Bungtlang South-ah BDO office leh RD Rest House te a hawng ang.