Vanlalhluti hnenah Best Farmer Award hlan a ni
Horticulture Department hian nimin khan RB McCabe Hall, Aijal Club-ah ‘Best Farmer Award 2023’ semna hun hi hmangin Mizoram District tin atangin mi pakhat theuh hnenah he Award hi hlan an ni a. Serchip District atangin thlai chingtu hlawhtling Vanlalhluti, Serchhip Dinthar Veng chuan he chawimawina hi dawngin Award hian lawmpuina thuziak leh pawisafai Rs. 10,000/- a keng tel a. Deputy Chief Minister Tawnluia’n a hlan a ni.
Kum 46-a upa Vanlalhluti hi a pasal in boralsan tawhin chhungkaw member 6 niin Huan siam-a eizawng thin an ni a, Thinglubul (Zawlpui Phai)-ah kum 2007 atang khan Horticulture Department atanga thlai chi a dawn atanga bultanin a tirah Zikhlum leh Bawkbawn chauh a ching a. Tunhnaiah thlai chi dang Tomato, Chana, Bean, Antam, Broccoli leh Parbawr a chin belh lehin Acres 3-a zau-ah thlai hi an ching a ni.
Sum hnar dang lian nei lovin an thlai thar hralhna hi an sum lakluhna a ni ber a, kum 2020 khan cheng nuai 9.70 vel lalutin kum 2021-ah cheng nuai 9.51 vel an lalut leh a, kum 2022-ah pawh cheng nuai 9.92 vel zet lalut lehin kum thum chhung hian kumtin cheng nuai 9.71 vel lalut anga chhut an ni a. An thawhchhuah atang hian a fate zawng zawng chawm seilianin chenna In tha tawk tak an sa tawh bawk a ni.
Comments
Post a Comment