Agriculture Department hnuaia hmalakna te Agriculture Minister hovin thlirho a ni

Agriculture Department-a Officer leh Mizoram KVK-a Senior Scientists & Head te chuan nimin khan Agriculture Minister C. Lalrinsanga hovin an hmalakna hrang hrang thlirletin hmalak zelna turte an sawiho bawk.

Agriculture Minister Pisa-a hmalak dan thlirletna hunah hian Agriculture Directorate-a Officers te, District Agriculture Officers te leh KVK-a Senior Scientists & Head te telin Minister C. Lalrinsanga chuan District hrang hrang atanga tel te inlawmna thu sawiin, thutkhawm koh a nih chhan te a sawifiah a. Agriculture Department-a Joint Director (R&E) J. Rothanga chuan an thu ngaihtuah tura chhawpchhuah te sawifiahin, he thutkhawm a tel te hian Mizoram hmun hrang hranga leilet neituten mumal tak leh awmze nei zawk leh hlawk zawk a buh an chin theih nan Framers Producer Organization (FPO) chu District tinah din nise an ti a. Collective Farming Policy Cabinet in a lo pass tawh nen a rual a kal ho nise tiin heng Framers Producer Organization (FPO) te hi mumal taka Awareness te neih pui a, an lo hlawhtlin ngei theih nan Farm Mechanization lam a tha taka thuam nise an ti a ni.

Hei bakah hian Department in Scheme thar a kalpui tur Agro Forestry chu KVK ten kalpui in hma la se tiin he Scheme hnuaiah hian Registered Nursery te din tur a ni aa, chu nursery ah chuan sum chang thei thing (Quality seedlings) hmanga kuitiah-a farmers te chin tir atana pekchhuah tur a ni. Districts tina KVKs ten Trial leh Demonstration an kalpui thin te farmers ten tangkai zawk leh hlawk zawka hman zel theih nan Workshop neih thin nise tiin kumtin a kan thlai chi mamawh tam tak sum seng-a kan lei thin chu tualchhung ah thar ve theih a nih avangin hemi kawnga kan harsatna tawh thin sutkian nan Seed Village Programme chu uar zawkin kalpui nise an ti bawk.

Tun dinhmunah District hrang hrangah Fall Army Worm (FAW) te a lo awm leh tan tawh avangin thunun a nih theih nan nasa taka hma lo la leh turin District Agriculture Officers (DAO) leh KVKs te hriattir an ni a. Department in a siamchhuah OP-12 Biofertilizer chu a tam thei ang ber loneitute hman tura chhawpchhuah nise an ti bawk. Heng bakah hian Mizo la (Mizo Cotton -Land Race Cariety) chu a riral mai loh nan KVKs hrang hrangah te lo ching pung zel se an ti bawk a ni.