USA-a Mizo awm ten Chapchar Kut an hmang

Mizo Society of America (MSA) huaihawtin May 27 leh 28, 2023 khan Indianapolis, Indiana USA-ah Chapchar Kut hman a ni.

USA a Mizo awm ten kumin-a Chapchar Kut an hman ah hian thupui atan 'Zofate Inpumkhatna' tih hman a ni a, he hun hmanpuitu Central YMA General Secretary Prof. Lalnuntluanga chuan Mizote khawi hmunah pawh awmin, ram hrang hrangah ram mi nihna nei mah ila Chhinlung chhuak unau kan nihna vawng tlat turin a chah a. “Ramri kar danah awm mah ila Chhul khat kual kan nihna hriat leh vawnhim tlat a tul. Zofate kan inpumkhat nan Zohnahthlak hnam hrang hrang hruaitute'n mawhphurhna an nei lian,” tiin inpumkhatna nei tura mawhphurhna hlen chhuak turin a sawm bawk.

USA-a Chapchar Kut hmanna ah hian hnam lam leh zai te entir niin Football leh Volleyball hmanga inelna buatsaih a ni bawk.

He hun hmanpui tura kal Central YMA General Secretary Prof. Lalnuntluanga leh MSA hruaitute chu inkawmin Mizoram hmasawnna tura pawl pahnih thawhho dan a awm em tih an sawiho a. MSA hian Central YMA hnenah tanpui hna an thawhna atan cheng nuai 10 pek an remti bawk a ni. Central YMA General Secretary hi North America Mizo Christian Fellowship (NAMCF) hruaitute nen pawh inkawmin NAMCF te chuan Central YMA ten a tula an hman turin US Dollar 5,000 (Rs. 4,13,000) pek an remti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar