Samagra Shiksha hnuaia GSDP Football inelna hmasa ber Serchhip-ah I&PR Dy. Director in a hawng

Samagra Shiksha hnuaia Grassroot Sports Development Programme (GSDP) Mizoram State Level Football intihsiak hmasa ber chu nimin khan Serchhip-ah neih tan niin Serchhip DIPRO leh I&PR Department Deputy Director K. Saitluanga MIS chuan a hawng a, hemi rual hian Thenzawl-ah Hockey intihsiakna neih tan ve a ni bawk.

Serchhip Sports Complex-a Grassroot Sports Development Programme (GSDP) Mizoram State Level Football Competition hawnna hunah hian Serchhip DIPRO K. Saitluanga chuan Mizo thalaite zingah Football khela eizawng thahnem tak an awm tawh thu leh Football Players Association of India (FPAI) ten kumin-a India Football Player tha ber atana an thlan pawh Mizo tlangval Lallianzual Chhangte a ni tih sawiin, Footballer tam tak te chuan sawrkar-a Group A Officer ten kum khat-a an hlawh let 10 dawn dawn te an hlawh tawh thu a sawi a. Zirlai naupangte zingah anmahni a theihna awm te haichhuak tura sawrkar hmalakna hlutzia chu an hriat a pawimawh thu leh he hun remchang hi hmang tangkai turin naupang kalkhawmte a chah a. Anmahni-a theihna awmte haichhuak turin mahni inthununna tha te, thuawihna leh taihmakna te a pawimawh thu sawiin, “Kan taksa tichhe thei chi lam thil reng reng; zuk leh hmuam leh a kaihhnawih thilah pawh i fihlim ang u,” a ti a. Zirlai naupangte tan an nitin zirna hlamchhiah a thiang lo tih pawh sawiin, nitin zirna leh Sports lama inbuatsaihna chu rem takin a kalkawp thei a ni tih hre reng turin a chah a. Mizoram State Level inelna lian thleng thei khawpa Serchhip District in Sports Infrastructure tha a nei tawh chu thil chhinchhiah tlak hmasawnna a nih thu leh hetiang thleng tura thawktu tha tak tak kan nei chu an inpekna lawmawm a tih thu a sawi bawk.

GSDP Mizoram State Level Football Competition hawnna hun hi Serchhip SEDO leh Samagra Shiksha-a Addl. DPC R. Vanlalmuka chuan kaihruaiin Lalremruata, APO, Samagra Shiksha, Serchhip District chuan Report a pe a, Grassroot Sports Development Programme chu Samagra Shiksha hnuaia an hmalakna pakhat a nih thu leh kum 2022 atanga kalpui niin Mizoram pumah Football Centre 13 awmin Aizawl leh Lunglei District ten Centre pahnih ve ve neiin District dangten Centre pakhat theuh an nei a. Hockey, Boxing leh Weightlifting-ah te Centre 7 theuh din tawh niin Badminton-ah Centre paruk kalpui mek an ni. State Level Sports Association 5- Football, Hockey, Boxing, Badminton leh Weightlifting te nen heng Centre kalpui tur hian thawhhona thuthlung an ziak fel tawh bawk a ni.

State Level Competition hi May 16-19, 2023 chhung khan Aizawl-ah Boxing, Badminton leh Weightlifting-ah te neih ni tawhin Football leh Hockey hi Serchhip District-ah nghah a ni a, Football hi Serchhip Sports Complex-ah khelh niin Hockey hi SAI Hockey Ground, Thenzawl-ah khelh tur niin nimin vek khan PTS Thenzawl Principal H. Lalthangzuala chuan a hawng bawk a ni.

  Tun tuma Football intihsiakah hian District 11-a Grassroot Football Centre 13 atangin Team 11 an tel a, Group 3-ah inthenin Group pakhat-a awm te zel hi an inkhelh kual hnuah Team 4 in Semi Final an lut dawn a ni. Hockey inelna ah hian Centre pasarih atangin Mipa Team 5 leh Hmeichhia Team 5 an tel thei a. Pool 2-ah ve ve thenin Pool pahnih-a a sang ber ve ve ten Final an khel dawn a, tunkar Zirtawpni khian Final khelh a ni ang.