Dy. CM in Tourist Guidance Information Kiosk leh Sanitary Napkin Vending Machine te a hawng

Deputy Chief Minister Tawnluia chuan nimin khan Aizawl-a Millenium Centre Atrium-ah Tourist Guidance Information Kiosk leh Sanitary Napkin Vending Machine te hawngin mipuite hman theih tura hlan a ni.

He hunah hian Deputy Chief Minister chuan khualzin miten Mizoram chungchang hrilhhriatna, khualzinmite tana tangkai leh bengvar-thlak tak, an veivahna leh hawiharh nan leh khawchhunga Hotel leh hmun pawimawh hriattirna 'Information Kiosk' hawn theih a nih chu hmasawnna ropui tak a ni tih a sawi a. Ramchhung leh pawn atanga khualzin veivak ten information an mamawhte pholanna Kiosk chu Aizawl khawpui laili-a hmun pawimawhah te bakah Lengpui Airport-ah bun a ni dawn tih sawiin, Kiosk atang hian khualzin miten Mizoram chungchang an hriat duhte an hre zung zung thei tawh dawn a ni, a ti bawk.

Hmeichhiate tana awlsam zawk leh an mamawh huna hman mai tur Sanitary Napkin Vending Machine mipuite hnena hlan a ni bawk chu lawmawm a tih thu sawiin, Sanitary Napkin Vending Machine pawh sikul hrang hrang bakah Aizawl khawpui hmun thenkhat-ah dah mek a nih thu a sawi a. Hetih rual hian mipui vantlang hmasawnna tura khawl bunte hi dimdawi thiam tur leh neitu rilru pu a humhalh tlat turin kalkhawm mipuite a chah a. Heng hmalaknaa a bultumtu UD&PA Department hnuaia Smart City bakah Tourism Department-te chu fakawm a tih thu a sawi bawk.

Deputy Chief Minister chuan UD&PA Department chu fakin, khawpui changkanna ngaihtuahtu an nih rualin mirethei leh harsa zawkte khaichhuahna leh an hmasawnna ngaihtuah thin an nih thu a sawi a. Smart City hnuaiah Project hrang hrang 30 chuang thawh mek a nih thu tarlangin, Aizawl khawpui hmasawnna kawngah an thawk nasa hle a ni, a ti bawk.

Comments

Popular News (Last 30 Days)

Vawiin-ah HSSLC Exam result