Aizawl-ah TGFI Convention vawi 24-na neih a ni

Tourist Guides’ Federation of India (TGFI) Convention vawi 24-na chu nimin khan Aizawl-a Dawrpui Multipurpose Hall-ah neih a ni.

Mizoram Tourism Department leh Tourist Guide Federation of India tangkawp buatsaih Tourist Guide Federation of India (TGFI) Convention hi Tourism Minister Robert Romawia Royte chuan khuallian niin a hmanpui a, TGFI ten Mizoram-a khawmpui an rawn nei chu a lawmawm hle tih sawiin, he khawmpui kaltlang hian zinmi ten Mizoram an hriat phah ngei a beisei thu a sawi a. Tourism Department hmalakna hrang hrang te tarlangin ‘Mizoram Responsible Tourism Policy’ chu India rama a hmasa ber ni turin kum 2020 khan tlangzarh a nih thu leh he Policy hian Tourism-a hmasawnna tluantling leh tlo, ram leilung tichhe lo leh mitin huapzo neih chu a tum ber a nih thu a sawi bawk.

Heng bakah hian Minister chuan Thenzawl khuaa hmunhma hrang hrang te ‘Virtual Reality’ hmanga chhim theihna tur ‘Thenzawl Calling’ application chu hman theih a nih tawh thu te, zirna In hrang hrangah Ministry of Tourism duhdanin ‘Yuva Tourism Club’ din a nih tawh thu leh Tourism Department hnuaiah Tour Guide mi 89 an awm tawh thu te a tarlang a. Mizo Tour Guide te TGFI-a an inziahluh ve theih nan TGFI hruaitute chu hmalakpui turin a sawm nghal bawk.

He hun hi Ministry of Tourism Director General Manisha Saxena-i chuan khualzahawm nia hmanpui bawkin Tourist Guide te chu khualzin te lo chhawn hmasa ber tu an nih avangin ram hmel lanna pawimawh tak an nih thu a sawi a. India culture-ah mikhualte chu pathian tluka zahna pek (Atithe Devo Bhava) thin an nih thu sawiin, he nunphung mawi tak hi vawnghim zel turin Tourist Guide-te chu a sawm bawk.

TGFI Annual Convention-ah hian Mizoram Tourism Joint Secretary V. Lalengmawia chuan 'Business Promotional Activities from Mizoram Tourism' tih thupui hmangin presentation a pe a, sawihona hun te hmangin Tourist Guide-te'n COVID-19 hnua chona an hmachhawn hrang hrangte sawiho a ni bawk. He hunah hian Stall 10 hawn niin Mizo hnam hrang hrang ziarang kaihhnawih thuamhnaw, ipte, ei leh in leh thil dang phochhuah a ni.

Tourist Guides’ Federation of India (TGFI) hi kum 1996 khan din niin Tourism leh a kaihhnawih Sector-a sawrkar laipui puibawm tur leh India rama Tourist Guide te hmasawnna ngaihtuah tura din a ni a, tun dinhmunah Tour Guide 3400 vel member an nei mek a ni. TGFI Convention hmang tur hian India ram hmun hrang hrang atangin Tour Guide 132 an fuankhawm a, niminpiah khan Mizoram rawn thlengin Thenzawl an tlawh nghal a, Vawiin hian Reiek tlang tlawh lehin naktuk-ah Mizoram an chhuahsan dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar