BDO Office hi mipuiin an harsatna an thlen a, sutkian sak an nihna hmun tur a ni - RD Minister

Rural Development (RD) Minister Lalruatkima chuan BDO Office chu mipuiin an harsatna an thlen a, sutkian sak an nihna hmun tur a nih thu sawiin, thingtlang khaw hrang hrang atanga rawn pantute hawihhawm taka lo dawnsawn a, lo tanpui chu thawktute mawhphurhna a nih thu a sawi.

Bungtlang 'S'-a Block Development Office-cum-Panchayat Bhavan building sak thar leh Rural Development Department Rest House thar hawnna hun nimin-a Bungtlang 'S' BDO Office Conference Hall-a neih ah RD Minister Lalruatkima chuan BDO Office chu mipuiin an harsatna an thlen a, sutkian sak an nihna hmun tur a nih thu sawiin, thingtlang khaw hrang hrang atanga rawn pantute hawihhawm taka lo dawnsawn a, lo tanpui chu thawktute mawhphurhna a nih thu a sawi a. RD Department hnuaia Scheme hrang hranga sum lo kalte chu tangkai taka hmang tur leh thawhrimna leh taimakna nena hlawhtlinpui tum turin hamthatna dawngtute chu a chah a ni. Minister chuan RD Minister a nih hnuah kum 4 chhungin MGNREGS-ah ni 100 inhlawhna an siam zat zat thei tih sawiin, kumin kum tharah pawh ni 100 inhlawhna siam leh turin ruahmanna siam a nih thu a sawi a, kum 5 chhungin ‘Ni 100 inhlawhna’ tih hming putu MGNREGS chu a hming ang ngeia dik taka kalpui theih a ni tur chu lawmawm a tih thu a sawi a. Sawrkarin ram hmasawnna tur leh mipuite hamthatna tur ruahmanna hrang hrang a siam thinte tha taka thlawp zel turin mipuite chu a chah bawk a ni.

Bungtlang 'S' BDO Office building hi MGNREGS leh MzSRLM convergence atanga cheng nuai 172.94 senga sak a ni a. July 11, 2022 khan hna tan niin, April 20, 2023 khan thawh zawh a ni a. A building hi a dung ft. 61 leh a vang ft. 31 niin chhawng li a ni a; Canteen, Chowkidar Quarters, Officer leh Staff Room bakah Conference Hall te a awm a ni.

RD Department Rest House hi MG-NREGS Material Component atangin cheng nuai 8 sengin building ruhrel awm sa cheithat a ni a. A dung ft. 52 leh a vang ft. 36-a zau niin, pindan panga - VIP Room 1, Semi-VIP Room 1 leh Ordinary Room 3 awmin Ordinary Room-ah hian khum 3 theuh dah a ni a, a zavaiin khum 11 a awm aa ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man