Zangnadawmna pek dan dik lo nia hriat zirchiang

Vairengte leh Aizawl inkar National Highway 306 (A) laihzauh hna NHIDCL in an thawh turah zangnadawmna pek dan dik lo nia lang chungchang chu MJA Kolasib District te chuan an chhui chiang.

He kawng laihzauh tura Bilkhawthlir leh a chhehvel-a Package 3 leh 4 huamchhunga zangnadawmna sem tawh RTI hmanga an zawhna chhanna an dawn atanga thil dik lo ni-a langte zirchiangin Inrinni khan MJA Kolasib District te hian Bilkhawthlir an tlawh a. Bilkhawthlir VC leh YMA hruaitute kawmin thu an zawhfiah a, mi hrang hrang an kawmkualna atanga an thu hriat thenkhatah VC pakhat chuan VC pass lehkha dahkhah loh chu mi pakhat hnena an pek thu leh hei hi Journalist a nih thu an sawi a. He mi hian Sawrkar-in ram lak chungchanga thuneitu-a ruat, Competent Authority for Land Acquisition (CALA), Kolasib Addl. DC ni bawkin ram ruak a hria a, VC pass pe tura a dil angin VC Pass lehkha dah khah loh hi an lo pek mai thu a sawi a. Hei bakah hian ram cheng nuai 60 a hralh atangin a leitu-in zangnadawmna cheng nuai 200 chuang a lak chungchangah a ram neitu chuan a ram hralh chu Mau hmun a ni a, meter 300 kawng kalna tur chin a hralh thu a sawi a, RTI chhanna-a a lan danah chuan, he ramah hian thlai chi hrang hrang bakah kuhva leh Thing chi hrang hrang awm anga ziah a ni. 

Kolasib District MJA chuan, zangnadawmna pek chungchanga thil dik lo ni-a langah hian thu dik haichhuah a nih theih nan hmalak chhunzawm zel an tum thu leh an thil hmuh dan chu thuneitute hnena thlen an tum thu an sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar