ECI Team ten State sawrkar hotute an kawm

Mizoram inthlanpui lo awm tur chungchangah Election Commission of India atanga lo kal Senior Election Commissioner leh a Team-te chuan niminpiah khan sawrkar hotu pawimawh te kawmin inthlan felfai tak neih a nih theihna tura thil tulte an sawipui.

Secretariat Conference Hall-a thutkhawm neih ah hian Chief Secretary, Director General of Police leh Department hrang hranga Secretary-te telin Chief Secretary Renu Sharma chuan ECI Official-te chu Mizoram-ah lo lawmin Inthlanpui felfai tak neih a nih theih nan sawrkarin hma a la mek tih a tarlang a. ECI duhdan ang ngeia inthlan kalpui a nih tur thu sawiin, a hun takah Mizoram an rawn tlawh thu leh inthlanpui lo awm turah ECI duhdan leh ngaih pawimawhte ti hlawhtling turin chak takin sawrkarin kut a thlak zel dawn tih ECI official-te chu a lo hrilh a. Mizoram chu India rama State ralmuang ber a ni tih sawiin, inthlan felfai takin neih a lo ni fo tawh thin a, kumin a inthlanpui lo awm tur pawh felfai leh ralmuang takin neih a nih leh ngei a beisei thu a sawi bawk.

He hunah hian Senior Election Commissioner Dharmendra Dharma chuan Election Commission of India-in a duh ber chu inthlanna felfai leh thianghlim tak neih a ni tih sawiin, Polling Station ralmuang taka siam leh tui thianghlim in tur leh inthiarna tha tak neih bakah rualbanlote tan pawha Wheelchair hmanga awlsam taka vote an thlak theih nan a 'ramp' dah te, Covid Vaccine vawihnih la chauh duty tir te, inthlanpui laia zu leh ruihhlo hluar thin tihbo bakah pawisa tam tak sem thin chu tihrem a ngaih thu a sawi a. Social media hmang sualna tam tak, a bik takin dawt hmanga inbeihna leh thudik lo thehdarh thin te man chhuah leh hrem te, Election Official-te zin veihvahna tur atana felfai taka ruahmanna siam te an duh thu a sawi a. Heng zawng zawng tihhlawhtlin a nih theih nan sawrkar Department Secretary-te chu hma la tura a duh thu a sawi rualin harsatna an neih chuan inthlahrung lova ECI hnenah hriattir turin a chah nghal a, a theihna apiangah ECI chuan a tanpui dawn tih a sawi bawk

Senior Election Commissioner leh a Team-te hian nimin khan Mizoram inthlanpui lo awm tura sawrkar laipui hnuaia Agencies-te inbuatsaihna hrang hrangte enpui lehin heng Agencies te hian kum 2018 inthlanpui ah dan kalh thil chi hrang hrang- zu, damdawi leh pawisa lem te pawh man a lo ni tawh tih an sawi a, Social Media lama dawt thehdarhna kawngah pawh theihtawp an lo chhuah tawh thu an sawi bawk. Inthlanpui lo neih tawh atangin thil tam tak an lo in zirthiam tawh tih sawiin, kum tawp a inthlanpui lo awm tur pawh tha, felfai leh ralmuang taka neih a nih an beisei thu an sawi a. ECI duh dan leh tha tih ang taka inthlan hmachhawn thei turin hma an lo lak zel tur thu an sawi bawk a ni.