Election Commission of India Official-ten Mizoram inthlanpui lo awm tur inbuatsaihna enfiah

Election Commission of India (ECI) atanga lo kal Senior Election Commissioner Dharmendra Sharma leh a Team te chuan Mizoram inthlanpui lo awm tura inbuatsaihna hrang hrangte nimin khan endikin Mizoram District hrang hranga District Election Officer (DEO) ten an hmalak mekna te an hrilhfiah bawk.

Mizoram in kumin kumtawp lama State Assembly inthlan a hmachhawn tur atana inbuatsaihna hrang hrang enfiahna hi Secretariat Conference Hall-ah neih niin District 11 atangin District Election Officer (DEO) leh Superintendent of Police (SP) te an tel a. Dharmendra Dharma chuan Election Commission of India-in a duh ber chu inthlanna felfai leh thianghlim tak neih a nih thu sawiin, Vote nei zawng zawngte vote thlak tura fuih bakah ralmuang taka mipuiten vote an thlak theih nana Dan kenkawh kawnga hmalakte chu pawimawh hmasa a ni, a ti. EVM hmantlak chauh hmang tur leh Polling Station zawng zawngten vote thlakna tura tul (facilities) an neih te, sum leh pai uchuak taka hman anih loh nana hmalak a ngaih thu sawiin, Mizoram chuan inthlanna felfai tak a neih thin thu leh India rama State ralmuang ber a nih ang takin inthlanpui lo awm tur pawh thianghlim, felfai leh ralmuang tak neih a nih theih nan a hmala turin District Election Officer leh Superintendent of Police-te chu a chah a ni.

He hunah hian Mizoram District 11 atanga DEO te chuan presentation tawi hmangin kum 2018 inthlanpui-a anmahni District dinhmun tlangpui (statistics) leh kumin inthlanpui lo awm tur a an hmalakna hrang hrang leh harsatna an neih te an sawifiah a. Election Commission of India (ECI) lam chuan heng inbuatsaihna hrang hrang ah hian tanpui an ngaihna laiah tanpui an tum thu leh an inhuam thu an sawi rualin an duhkhawp lohna lai leh hmalak ngai laite DEO-te hi an lo hrilh a. Inthlanpui felfai tak neih a nih theih nan District tin a DEO leh SP-ten Election Manual and Instructions chu ECI website-ah en fo turin an chah nghal a ni.

Mizoram inthlanpui lo awm tura inbuatsaihna hrang hrangte endik tur hian  Election Commission of India atang hian Senior Election Commissioner Dharmendra Sharm bakah Nitesh Vyas (Sr. DEC), Hirdesh Kumar (DEC), R.K. Gupta (DEC) bakah Senior Principal Secretaries, Under Secretary leh Director te an lo kal a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar