CM in PWD Rest House leh quarters a hawng

Bilkhawthlir a PWD Rest House leh Chowkidar quarters thar chu nimin khan PWD changtu Chief Minister Zoramthanga chuan a hawng.

Chief Minister chuan kum 2020 March thla khan ama hovin helai hmun hi tlawhin Rest House leh Chowkidar quarters sak dan tur hi an lo en tawh thu sawiin, hripui lengin bumro mahse hetianga a hawn theih a ni te chu lawmawm a tih thu a sawi a. Tunhnaia Hri leng te, lirnghing te, kangmei chhuak, raltlan, ramri buaina leh thil dang dangin Mizoram a nghawng dan te sawiin, history atangin indopui avanga ram tluchhia leh retheih phah te an intundin dan leh hausa taka an insiamchhoh leh dan khan hmuh thu a sawi a. “Chutiang ang chuan keini pawh tumruhna nen hma la in, dinhmun tha zawk leh sang zawkah kan inhlang thei a ni tih a chiang a, chumi tur chuan kan inbuatsaih a tul,” a ti a. Hmathlir, vision tha tak neih a pawimawh thu pawh sawiin, ram entawntlaka kan insiam dawn chuan tlachawp taka rorel emaw, tlachawp taka thil tih zel a chi loh thu a sawi bawk.

Chief Minister in a hawn tak Rest House leh Quarters hi cheng nuai 412.39 senga sak niin December ni 15, 2020 khan thawh tan a ni a, February ni 28, 2023 khan sak zawh a ni. Rest House hi chhawng thum - Basement, Ground Floor leh First Floor awmin, Basement-ah Dormitory, Choka leh Chaw eina siam a ni a, Ground Floor-ah Ordinary Room 8 awmin, First Floor-ah VIP Room 2 leh Ordinary Room 7 leh Lounge dah a ni.