Union Minister of State in Mamit leh Champhai tlawh

Union Minister of State for External Affairs & Culture Meenakashi Lekhi-i chuan nimin khan Mamit tlawhin Mamit-a sawrkar Department hotute nen inkawmna an nei.

Mamit DC Conference Hall-a inkawmna hunah Union Minister chuan Sawrkar hnathawk, Aspirational District, Mamit-a awmte rilru puthmang chu mipui hmasawnna a ni tur a ni tih sawiin, mipui ta an nih angin ram leh mipuite tana theihtawpchhuaha hna thawk thin tur leh mipuite mamawh hriat tuma rang taka chet la thin turin a chah a. Mamit chu Plastic bawlhhlawh sawngbawl chungchangah fakawm a tih thu sawiin, a kalna kawngah Plastic bawlhhlawh paih mai mai hmuh tur a tlem chu thil lawmawm tak a nih thu a sawi a. Chutihrualin, nakin hun zelah Plastic bawlhhlawh sawngbawlna kawngah Mamit khawpuiin buaina a neih loh nan tun atanga Plan tha tak DUDO Office kaltlanga siam a, buatsaih theih nise a duh thu a sawi bawk.

Union Minister hova inkawmna hun hi Mamit District Bawrhsap VL. Remliana chuan kaihruaiin Union Minister-in Mamit a tlawh chu a lawmawm a tih thu leh Mamit District-in hmasawnna hmel a hmuh ruala harsatna hrang hrang leh hmabak la awmte ngaihthlaksak a, hmalakpui a tumna kawngah lawmawm a tih thu a sawi bawk. Union Minister hian Govt. Mamit College a tlawh nghal bawk a ni.

Union Minister of State for External Affairs and Culture of India Meenakshi Lekhi-i hian niminpiah khan Champhai District tlawhin Champhai-ah District Bawrhsap James Lalrinchhana hovin sawrkar mi pawimawh ten an lo dawngsawng a, Vangchhia-a Kawtchhuah Ropui tlawhin hmalakna te a enfiah a. Ramri depa awm Zokhawthar khua tlawhin hmalak dante a enfiah bakah Govt. Vengthlang Middle School Champhai, Anganwadi Centre Dilkawn leh Health & Wellness Centre Khuangleng te tlawhin thawktute a kawm bawk a ni.

Vangchhe YMA Library Tual-a amah lawmna inkhawm neih ah Meenakshi Lekhi-i chuan Vangchhia chu India ram kawmkil taka awm ni mah se India ram bung pawimawh tak a nih thu tarlangin, “India khua leh tui vek kan ni a, in thu thlente pawh theihtawp chhuahin ka bawhzui dawn a ni,” a ti a. Hnam ziarang a ngaihsan avanga Mizoram a Archaelogical Survey of India (ASI) Protected Monument hmasa ber Kawtchhuah Ropui Vangchhia tlawh a nih thu leh hemi chauh nilo a dangte pawh haichhuaka ASI Protected Area a puan a nih zel theih nana hmalak tlan a tul hle tih sawiin, “Kan hnam chanchin leh ziarangte dik taka tu leh fate hnena hlan chhawn zel a pawimawh thu a sawi a, Vangchhe hmuna ASI hmunah ngawrh lehzuala zirchianna nei tura ngaihtuahna sen a nih thu a sawi bawk.