Sawrkar satliah ni lovin sawrkar tha siam ngei kan tum - MPCC President

Mizoram Pradesh Congress Committee (MPCC) President Lalsawta chuan kum 2023 MLA General Election-ah sawrkarna siam an tum thu sawiin, “Sawrkar satliah ni lovin sawrkar tha siam ngei kan tum a ni,” a ti.
Nimin-a Hrangtûrzo West Block Conference Khawlailung khuaa neih a hmanpuina ah MPCC President Lalsawta chuan kum 2023 MLA General Election-ah hian Party dangte nen an intlansiak thu sawiin, “Sawrkarna siam kan tum a, sawrkar satliah ni lovin sawrkar tha siam ngei kan tum a ni. Candidate hausa ringawt kan thlang dawn lova, mi dik leh mi rinawm, ram leh hnam tana a tha ber ber kan rawn vawrh chhuak dawn a. Campaign-na tura chêng nuai 200, nuai 300 ka nei tawh ti ho te hi chu Congress Party hian ti beidawng teh ang u. Kumin hi a bultanna atan hmang ila, sum hmanga Vote lei tumte chu lo ti zak ula, lo hnawl ngam zel turin ka ngen che u a, hetiang mihring hi Mizoram in a mamawh lo a ni,” a ti. MPCC President chuan Pathian in ram tha leh mihring tha min pe tih sawiin, “Mipuiin kan nghah mek chu Sawrkar tha a ni. He Sawrkar tha pe tur che u hian Congress Party hian kawng dik kan kawhhmuh che u a, kan hnenah hian lo kal zel rawh u tiin mipui kan sawm che u a ni,” a ti bawk.

Tang puina chu an sem dawn loh thu leh an pek dawn thu MPCC President chuan sawi bawkin, “Tang tak takte kan pui dawn a. Kan tan tam poh leh kan ram a tha ang a, kan thawhchhuah a lo tam ang a, ramin hma a sawn phah dawn a ni. Phai atanga chawhmeh rawn lut zawng zawngte hi kan enfiah ang a, intodelh dan kan zawng ang. Kan Manifesto No. 1 angin Mizo hnam hi hnathawk hnam ni turin kan siam ang a, mi taima hlawhtlinna atan chuan Congress Party chuan sum (budget) kan dah dawn a, thil harsa a ni reng reng lo a, kan ti ang kan tih chu kan ti tak tak dawn a ni,” a ti bawk.

Hrangturzo West Block Congress Conference-a tel te hian MPCC President Lalsawta'n MPCC a kaihhruai dan tha an tih thu leh an rintawk thu bakah kum 2023 MLA General Election lo awm turah Hrangturzo bial-a ding tur an hotuten an dah apiang lawm taka pawmin, an tlin ngei theih nan theihtawp an chhuah tur thu Resolution siamin an pass bawk a ni.

Nimin-a he hun hmanna ah hian Hrangtûrzo bial chhung atangin Congress Party zawm thar mi 106 te lawmluh an nih thu MPCC thuchhuah chuan a tarlang bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar