Samagra Shiksha GSDP State Level Competition kharna Serchhip-ah neiin Champhai an champion

Mizoram Samagra Shiksha hnuaia Grassroot Sports Development Programme (GSDP) State Level Competition hmasa ber chu nimin khan Serchhip Sports Complex-ah kharna hun hman a ni a, a pumpui-ah Champhai District chuan Gold Medal pahnih leh Silver Medal 2 lain an champion a ni.

GSDP State Level Competition hmasa ber kharna hun nimin-a Serchhip Sports Complex-a neih hi Serchhip Addl. DC James Lalnithanga chuan khuallian nia hmanpuiin sawrkar hmalakna pawimawh tak zingah Grassroot Sports Development Programme chu tangkai tak leh a nihna tur ang taka hmang turin Zirtirtute leh Zirlai naupangte a chah a, Sawrkar hna in min daih vek loh avangin eizawnna dang dap a ngaih thin thu te, Sport lama eizawng thei turin naupan lai atanga inzirtirna tha an dawn ngei theihna turin GSDP chu a pawimawh thu leh zirtirtute pawh theihtawp chhuahpui turin a sawm a, GSDP Mizoram State Level intihsiakna tluang taka neih a nih theihna tura tha leh zung sengtu Zirlaite, Zirtirtute leh Samagra Shiksha hnuaia thawktute zawng zawng chungah lawmthu sawiin duhsakna a hlan bawk.

Serchhip DEO leh Samagra Shiksha Serchhip District-a DPC Lawmawma kaihhruai he hunah hian Samagra Shiksha Mizoram-a Programme Officer Lalhmingsanga chuan report pein Grassroot Sports Development Programme hnuaiah hian Mizoram chhung District hrang hrang ah Centre 40 a awm thu leh hetah hian Trainers leh Asst. Trainers dah vek an nih thu a sawi a ni.

Tun tuma State Level Competition hi Boxing, Badminton leh Weightlifting te Aizawl-ah intihsiak niin, Football leh Hockey hi Serchhip District-ah nghah niin Football hi Serchhip Sports Complex-ah leh Hockey hi Thenzawl SAI Hockey Ground-ah khelh a ni a. A pumpui ah Gold Medal pahnih leh Silver Medal 2 latu Cham-phai District chu Champion in Gold 2 leh Silver 1 laiin Aizawl District chu pahnihna an ni. Football-ah Lunglei District Champion in Hockey Mipa-ah Kolasib District leh Hmeichhia-ah Aizawl District; Badminton-ah Lawngtlai District; Weightlifting Mipa-ah Champhai District leh Hmeichhia-ah Aizawl District an champion a, Boxing-ah Champhai District an champion bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar