Naupang hri danna pek kalpui dan thlirho

Nimin khan Serchhip-ah District Task Force on Immunization chu an Chairman leh Serchhip District Bawrhsap Nazuk Kumar IAS hova thukhawmin nausen in hri danna an lak turte kim taka an lak theihna tura hmalak dan tur hrang hrang an sawiho.
He thutkhawm Serchhip DC Meeting Hall-a neih ah hian Health Department in nausen pianghlim leh naupang kum khat an tlin thlenga hri danna an pek thin, Routine Immunization an tih thin Serchhip District-a kalpui a nih dan te thlirho niin thingtlang lama cheng ten hri danna hi an lak that laiin khawpui lamah erawh la tha tawk lo an tam thu leh an target pawh an phak mang lo tih tarlan a ni a. Health Department hotute chuan khawpui lamah chuan pem leh In luahsawn te an awm deuh reng thin avanga hetiang thil hi thleng thei a ni tih sawiin, tuna an dinhmun mek atanga hmasawnna tur hrang hrangte an sawiho a. Tunkar chhung hian Serchhip Main Centre hnuaia thawktute tan hemi chungchang sawihona hi neih tum niin thutkhawm kaihruaitu Serchhip District Bawrhsap chuan DC Office atanga hemi chungchanga tih theih an neih ah te an theihtawp an chhuah tur thu a sawi a ni.


Health Department hotute chuan nausen an pian hlim atanga thla 9 an nih thlengin hri danna an lak turte la kim vek turin Sub-Centre emaw, hri danna lakna ah tum 7 kal a ngai tih sawiin, heng te hi natna chi 11 laka invenna a nih thu an sawi a. Heng hri danna te hi a thlawna lak tur a nih thu leh uluk taka enkawl leh hri danna atana him tura enkawl a ni tih sawiin, hemi chungchang hi mipuite hnenah nasa zawka puanzar nise an ti a. Tun sawrkar kum thar atang hian nausen ten hri danna pekna hmun awlsam zawk an pan theih dan tur ruahmanna siam te pawh rawt a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar