Raltlan rawn lut pung zel

Manipur buaina avanga Mizoram-a raltlan rawn lut chu nimin tlai thleng khan mi 7927 an tling ta a, Serchhip District-ah pawh mi 47 zet an awm tawh a ni.

Serchhip DC Office atanga thu kan dawn danin raltlan rawn lut hi nimin khan mi 17 ziahluh belh leh awmin an vai hian Thenzawl East VC huamchhunga awm te vek an ni a, an zinga 10 te hi D. Phailien atanga rawn lut an ni a, Tharoilok atanga rawn lut mi 5 leh Lingsiphai atanga rawn lut mi 2 te an ni a. Thenzawl East-ah hian raltlan mi 27 zet awmin New Serchhip South ah 9, P&E Veng leh Serchhip Kawnpui-ah 4 ve ve leh Darnam-ah 3 an awm a ni.

Mizoram District hrang hrang zingah Kolasib District-a raltlan lut tam berin 2743 an lut tawh a, Aizawl District-ah 2610 leh Saitual District-ah 2229 an lut tawh bawk a. Champhai District-ah 176, Lunglei District-ah 59, Ser-chhip District-ah 47, Khawzawl District-ah 36, Mamit District-ah 23 leh Hnahthial District-ah mi 4 an lut tawh bawk a ni.