Serchhip Police ten Beer leh Kuhva hring an man

Serchhip Police te chuan Zirtawpni khan rampawn atanga lakluh nia hriat Cane Beer 3120 leh Kuhva hring bag 90 an man.
Thudawn danin Serchhip Police vakchhuak te chuan Zirtawpni khan Keitum leh Khawlailung inkar Tuichang Lei bula Truck pahnih te chu rinhlelhna an neih avangin an thil phurh te enfiah turin Serchhip Police Station-ah an rawn hruai a, hriatpuitu tur te koh an nih hnuah an thil phurh hi enfiah niin Truck pakhat Mz-06-3473 atangin khawchhak lam atanga lakluh nia hriat canned Beer 3120 zet an man a, litre anga chhutin litre 1560 vel zet nia chhut a ni. Heng Beer phurhna Motor khalhtu Lalhriatpuia (24), Tuithumhnar (Lawngtlai District) nia insawi chuan Champhai lama mi pali te bungrua chu a rawn phurh sak thu sawiin, heng te hi Aizawl lama phurhluh tur a nih thu leh mi hrang hrangte ta tur niin Tuikhurhlu atangin heng mite hian an lo lachhawng dawn niin an sawi a, Serchhip Police te chuan thubuai ziaklut nghalin hemi chungchang hi chhui zui nghal a ni.


Heng Beer te hi Satha Ip 65-ah dah niin a vaiin case 130 a ni a, Ip pakhat ah hian Case 2 zel dah niin case khat-ah hian Can 24 zel a awm a, tualchhunga hralhna anga chhutin a vaiin Rs. 7,80,000 man vel nia chhut a ni.

Serchhip Police ten Motor an enfiah pakhat zawk ah hian rampawn atanga lakluh nia hriat bawk Kuhva hring bag 90 man a ni bawk a, he Motor khalhtu hian Zokhawthar atanga heng Kuhva te hi rawn phurh a nih thu leh Aizawl-a dah tur niin a sawi a. Bag khat-ah hian kg. 25 zel a awm thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man