Kumin ah hri kai 57 hmu

Kumin chhungin Serchhip District-ah COVID-19 hri kai mi 57 hmuh an ni tawh a, hri kai zingah mi pakhat a boral bawk a ni.
Serchhip CMO Office-a IDSP thawktute hnen atanga thu kan dawn danin nikum December ni 12-a Ser-chhip District-a COVID-19 hri kai hmuhchhuah an nih hnua a hmasa ber ni turin kumin April 16 khan Serchhip District-ah COVID-19 hri kai hi hmuh leh an ni a, April thla khan hri kai mi 2 hmuh niin May thla ah hri kai hmuhchhuah pung lehin nimin ni 29 thleng khan hri kai mi 55 hmuh a ni a, hri kai hmuhchhuah hnuhnung ber May 22-a hmuhchhuah te chu enkawl dam ni tawhin tun dinhmunah hri kai enkawllai hi Serchhip District-ah an awm lo a ni.

Kumin chhunga Serchhip District-a hri kai hmuhchhuah mi 57 zingah East Lungdar khua tam berin mi 25 lai hri kai hmuhchhuah an awm a, Thenzawl khua atangin hri kai mi 18 hmuh ni bawkin  an zinga mi 17 te chu PTS-a mi te an ni a. North Vanlaiphai-ah hri kai mi 7 hmuh niin Sailulak-ah mi 3, Serchhip AOC Veng-ah 2 leh New Serchhip leh Mualcheng-ah hri kai mi pakhat ve ve hmuh an ni bawk. Serchhip District atanga kumin a COVID-19 hri kai hmuh zingah hian East Lungdar-a mi pakhat chuan nunna a chan a, midang 56 te chu enkawl dam an ni thung a. Kumin chhunga Serchhip District-a COVID-19 hri kai hmuhchhuah mi 57 zinga mi 8 te hi FIA hmanga hri kai hmuh niin midang zawng hi Rapid Antigen Test hmanga hri kai hmuh an ni.

Heti hian June 9, 2020-a Serchhip District atanga COVID-19 hri kai hmuhchhuah a nih hnuah Serchhip District atangin COVID-19 hri kai mi 14,673 hmuh an ni tawh a, heng zinga 14,636 te chu enkawl dam ni tawhin hri kai te zingah mi 37 chu an boral thung a ni. Serchhip District atanga COVID-19 hri kai hmuh zingah hian Vaccine Dose 3-na thlenga la chu mi 157 an awm a, Dose 3-na thleng la zingah hri kai boral mi pakhat a awm bawk a ni.

Comments

Popular News (Last 30 Days)

LPG man bithliah thar