Latest News

Kuthnathawktute hmakhua ngaiin sawrkarin theihtawp a chhuah - Deputy Chief Minister

Deputy Chief Minister Tawnluia chuan kuthnathawktute hmakhua ngaiin sawrkarin theih-tawp a chhuah tih sawiin, “SEDP hnuaiah pawh sum tam tak a dah a ni,” a ti.

Ni 4 chhung awh tur Horticulture Fair 2023 (30th May-2nd June, 2023) hawnna nimin-a Aijal Club Park-a neih a hmanpuina ah Deputy Chief Minister Tawnluia chuan kuthnathawktute hmakhua ngaiin sawrkarin theihtawp a chhuah tih tarlangin, SEDP hnuaiah pawh sum tam tak a dah tih a sawi a. Hlawhtlinna chang turin taima taka thawh a tul tih sawiin, Farmer te chu thawkrim turin a chah a, an thawhrimna te a thlawn mai loh nan anmahni tanpui leh dawmkang turin Sawrkar Department an awm reng a ni, a ti a, Thlai, Thei leh Pangpar hmanga eizawngtute hnathawh chu ropui a tih thu leh Mizo mipui ten anmahni ngaihsan a hun tawh takzet tih a sawi bawk. Mizoram in leilung hausakna a neihsa hmanga ‘Economy’ khaikanna tur remchang a neih langsar ber pakhat chu ‘Bamboo Development’ a nih thu pawh Deputy Chief Minister chuan sawiin, Mau chuan tangkaina tam tak a nei tih a sawi a, a tuai ei tur bakah Mau atanga thil siamchhuah chi hrang hrang tam tak a awm thu a sawi a, “Mau hmanga Mizoram tihhmasawn chu Chief Minister-pawhin a ngaipawimawh hle a ni,” a ti a. “Hmasawnna hi vawikhatah a lo kal nghal vek thei lo a, dawhthei taka nghah a ngaih chang a awm fo thin,” a ti bawk.

Market chi hnih State chhunga mipui chawmtu tur ‘State chhung Market’ leh hlawkna tak tak tel theihna tur ‘State pawn Market’ a awm thu pawh Deputy Chief Minister chuan sawiin, State pawn a hralh tur chungchangah chuan a kaihhnawih Department ten ngaihtuahna uluk taka an sen a tul thu a sawi a. Tunhnai mai khan Sialhawk Lakhuihthei chu State pawnah thawnchhuah anih thu leh thil chhinchhiah tlak a nih thu sawiin, Mizo tharchhuah tam zawk State pawnah thawn thei turin Farmer leh State sawrkar hnuaia Department-te tanrual a ngaih thu a sawi a, lungrual taka thawkho thin turin a chah bawk.

‘Horticulture Fair’ hi kum 2012 atang a hman tan niin kum 2012-2022 chhunga Stall neitu ten an hralhchhuah tawh zat chu Rs. 285,77,358 a ni a. Kumin hianStall 177 inphochhuakin Pangpar 128, Thei tiak 26, Pot 8, Leitha 4, Mimal Entrepreneur 5, State pawn 4 leh Department Stall 2 te an ni.

Comments

Popular News (Last 30 Days)