MSU in HSSLC-a titha zirlai chawimawina an hlan

Mizo Students’ Union (MSU) General Hqrs. chuan kumin a pawl 12 (HSSLC) Exam-a Mizo Top 3 te lawmpuina hun nimin khan hmangin MSU Special Award pawh sem nghal a ni.

Aizawl Vaivakawn Cultural Centre Cum Auditorium-a he hun hman hi Supply Minister K. Lalrinliana chuan khuallian nia hmanpuiin he huna kalkhawm zirlaite chu tunlai thiamna hrang hrang leh material kimchang tak hmanga lehkha zir thei an nih avangin an vannei takzet tih a sawi a, “Tuna zirlai kan lawmpuite hian Mizoram tan enge ka tih theih ang ti in lehkha zir sauh sauh turin ka chah che u a ni,” a ti. Minister chuan Pathian in Zofate tan hun a ruat tih pawh sawiin, tuna kan tawrhna chuan inpawhna tha lehzual leh Zofate inpumkhatna a kawk tih a sawi a, “Hmun hrang hranga chengte unau kan nihzia alang a, Hnam movement hi kan ngaihtuah reng a ngai a, ngaihtuahna fimtak kan hman reng angai a ni,” a ti bawk.

He hunah hian MSU General Hqrs. President Samuel Zoram-thanpuia chuan MSU hmalakna ah 80% chu zirlaite tan insawrbing in 20% chu ram leh hnam in a mamawhna apiangah an hmang thin tih a sawi a. MSU in zirlaite leh Ram tana an thawhna kawng hrang hrangah zirlaite tan hnemhnanna a awm ta zel chu sawrkar leh mi inphalte zar a nih avangin lawmthu a sawi a. MSU hmalaknaa Project kalpui leh tur te pawh a puangzar nghal bawk.

Nimin-a he hun hmanna ah hian HSSLC Examination 2023 result a Stream pathum-a Mizo Top 3 te hnenah lawmpuina leh chawimawina hlan a ni a, Arts-ah zirlai 3, Science-ah zirlai 4 leh Commerce-ah zirlai 6 te hnenah chawimawina hi hlan an ni a. Hei bakah hian MSU Special Award pawh sem niin 60% disability ni chunga First a pass H. Lalchhuanawma, Bethlehem Vengthlang High School hnenah pek a ni bawk a. Heng mi te hnenah hian thuziak bakah lehkhabu tha tak tak hlan an ni.