June 9, 2023-ah Green Mizoram Day hmang dawn

Nimin-a Serchhip District Level Committee on Green Mizoram Day thukhawm chuan thla thar June 9, 2023 khian Serchhip District-ah Green Mizoram Day hman nise an ti.
Serchhip District Level Committee on Green Mizoram Day hi nimin khan Serchhip Addl. DC James Lalnithanga hovin Serchhip DC Meeting Hall-ah thukhawmin kumin a Green Mizoram Day hman dan tur hi an rel a, June 11-a hman thin Green Mizoram Day hi kumin hian Pathianni a nih avang leh State Level Committee in June 9-a hman tura a ruahman angin June 9 khian Serchhip DC Conference Hall-ah he ni puala inkhawm neiin hemi hnu hian Serchhip Sports Complex ram hmun remchang ah thingphun beihpui thlak nise an ti a. Kumin-a thing phunna tur hmun hi DFO hovin lo enfiah lawk a ni ang. Kumin a Green Mizoram Day-ah hian thupui atan ‘Thingphun ila, enkawl zui ang u’ tih hman a ni ang.


Nimin-a thutkhawm ah hian Thenzawl DFO leh District Level Committee on Green Mizoram Day Member Secretary Lalbiakchama Chawngthu chuan nikum lama Green Mizoram Day hman a nih dan te tarlangin, nikum-ah Vanva lui hnar venna atan thingphun beihpui thlak a nih thu leh phunna tura ruahman ah thingtiak 240 phunin tunhnaia enfiahna ah za zela 80 vel nung anga ngaih a nih thu a sawi a. Green Mizoram Day pual vek hian hmun danga phun turin thing-tiak 2660 vel pekchhuah a nih thu a sawi bawk.

Thenzawl DFO chuan Green Mizoram Day puala thingphun zingah enkawl tha tak tak an awm thu pawh he hunah hian sawiin, chutih-rual chuan thingtiak phun duhtawka enkawl zui lem lo pawh an awm thin thu a sawi a. Hei vang hian kumin hian thingtiak phun tam aiin enkawl zui theih tur phun chu ngaih pawimawh a nih dawn thu a sawi bawk a ni. Nimin-a he thutkhawm ah hian District Level Committee on Green Mizoram Day Member te an tel tha hle a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man