Zangnadawmna hmuh har vangin ram neitu ten Serchhip by-pass Road siam mek an dang

National Highway-54 laihzauh leh siamthat hna thawh mekah he kawngpui in Serchhip khawpui a helna tur kawng laiha ram neitu thenkhat te chuan tun thlenga zangnadawmna pek an la nih loh avangin niminpiah (May 23, 2023) tlai dar 3:00 atang khan Serchhip by-pass Road hi an dang a, nimin tlai khan Serchhip Addl. DC James Lalnithanga hovin inbiakna an neih hnuah an kawng dan hi tihtawp a ni.
Nimin tlai-a Serchhip DC Meeting Hall-a inbiakna an neih ah hian Serchhip By-pass Road-a ram neitute chuan hun engemaw chen atanga harsatna an lo neih tawh thu sawiin, he kawng in a paltlang tura ram neitu tam tak te chuan zangnadawmna an lak tawh thu leh anmahni pawhin dawng ve mai tura an in ngaih laia an dawn tak mai loh thu leh heti chung hian an huan leh ram-ah te kawng laih hmalakna chu kalpui zui zel a ni tih an sawi a. Zangnadawmna an dawn tur ang te an hmuh miah loh laia kawngpui laihtlang a ni ta leh lirthei te pawh an tlan theih tawh laia hnathawh kal reng chu tha ti lovin nikum May thla khan ram neitute hi an lo inhmuhkhawm tawh thu leh hemi chungchang hi hnathawktute hnenah pawh thlenin, hnathawh tithuanawmptu nih duh lovin zawldawh taka an ngaihchan zel thu an sawi a.

Hemi chungchang hi nikum October thla khan Serchhip DC hnenah thlen lehin Addl. DC hova an sawiho hnuah December thla chhunga tifel tura an insawi laiin thla li a liam leh hnuah pawh tihfel ala nih loh thu ram neitute chuan an sawi a, “Vawiin thlengin a hlawhtlinna a awm tak loh avangin zangnadawmna hi kan account-ah a lut a nih loh chuan hna hi chawl ve rawh se kan ti a, hnathawk tur dan leh tih khawtlai hrim hrim hi tha kan tih a ni lo,” an ti bawk.

He Meeting-ah hian NHIDCL lam chuan zangnadawmna tihfel a nih theih nan hian an theih anga hmalakna an kalpui ve reng thu sawiin, tunah hian an pawisa hmuh tur ang te pawh pawm a nih tawh thu leh tunah hian a File Delhi-ah la awmin reilote ah tihfel theih an beisei thu an sawi a. Thutkhawm kaihruaitu Serchhip Addl. DC James Lalnithanga chuan ram neitute harsatna tawh chu an lo enzui pui tur thu leh Company lam pawhin chak zawka hma an lak theih nan an lo vilpui tur thu a sawi bakah an hmalak dan te pawh inhrilh tawn zel anih tur thu a sawi a. Sawihona an neih hnuah zangnadawmna chungchang File hi Delhi-ah awm mekin sum pawh an Account-a lut mai thei dinhmun ah a din avangin ngaihchan leh nise tiin kawngpui dan mek pawh hi tihtawp rih nise an ti a, June 15, 2023 hmaa zangnadawmna sum hi an Account-ah a lut lo a nih chuan tiamchin awm lova kawngpui hi dan leh nise an ti a ni.