Lenkawl

Mizoram Pradesh Congress Committee Vice President Lalnunmawia Chuaungo chuan Mizoram Lok Sabha MP Inthlanpui lo awm turah mipui ten an ngaihtuahna tak tak hmanga Vote an thlak chuan INC Candidate Lalbiakzama an Vote a beisei thu a sawi.

Lok Sabha Inthlanpui neih turah Serchhip District-a kum upa (kum 85 chunglam) leh Vohbik (AVES) te chu tunkar Ningani atang khan an chenna In-ah Vote thlak tir an ni dawn.

Mizoram Badminton Association (MBA) chuan tun Season chhunga Player che tha hnenah Inrinni khan ‘MBA Awards 2024’ semin Serchhip khaw mi pahnih in Award an dawng a ni.

Lawngtlai-a MFA Cup 2024 khelh mekah FC Serchhip Kawnpui te chuan hnehna an chang ve ta. An match hmasa pahnih-a an tlawm hnuah FC Serchhip Kawnpui te hian Inrinni khan an match thumna khelin Mamit District aiawha tel Hmar Veng FC an hmachhawn a, C. Laldintluanga leh Dennis Lalhruaitluang te goal khung hmangin si hnih faiin hnehna an chang a, point 3 an hmu ve ta a ni. FC Serchhip Kawnpui te hian Vawiin hian an match lina khelin chhun dar 12:30-ah Khawzawl District aiawha tel Vengthar FC chu an hmachhawn leh dawn a ni.

Salvation Army India Eastern Territory-a Territorial Commander Col. Lalhmingliana leh Territorial President of Women's Ministries Col. Lalhlimpuii te chuan nimin Pathianni hmang khan The Salvation Army Serchhip C.O Bial an rawn tlawh a, heng Salvation Army hotu pahnih te hian Inrinni khan Serchhip rawn thlengin Inrinni zan khan Serchhip Corps-ah Tawngtai Inkhawm neih a ni a, nimin Pathianni chawhma lam khan New Serchhip Corps-ah Thianghlimna Inkhawm neihpuiin nizan khan Serchhip Corps-ah Chhandamna Inkhawm an neihpui leh bawk a. Vawiin hian Aizawl an pan leh dawn a ni.

Inrinni kalta khan BCM hnuaia Bungtlang Pastor Bial Thalai Kristian Pawl (TKP) te chuan Serchhip Blood Bank-a dah turin thisen Unit 40 an pe a, thisen petute hi mipa 25 leh hmei-chhia 15 an ni. Bungtlang Bial TKP thisen pekna hun hi Rawpui Community Hall-ah neih niin Ser-chhip atangin thawktute an kal a ni.

BJP Mizoram Pradesh chuan Inrinni khan Aizawl-a an Pisa-ah BJP dinchampha vawi 44-na an lawm a, he hunah hian Dr. K. Beichhua MLA chuan BJP chu Deendayal Upadhyay te, Dr. Shyama Prasad Mookerjee ten uluk taka an lo din a ni tih sawiin, Vawiin-ah chuan khawvel-a Party lian ber dinhmun luahtu an nih thu a sawi a, Mizoram-ah party thangduang tak an la nih ngei a beisei thu a sawi bawk.

Lawngtlai District chhung Sakeilui-II khua a cheng Mithun Chakma (31) chu nimin khan Tek in dengin a boral a, thudawn danin Mithun Chakma s/o Debo Kumar hi an thenawm ten chaw ei tura sawmin a kal a, chaw an ei laiin Inchhung-a a awm chu Tek hian a deng a, ka pawh chhawn lovin a boral nghal a ni. Mithun Chakma hian a nupui leh a fate naupang pathum a kalsan a ni.

Tunhnai a rial tla, thlipui tleh leh ruahsur nasa avanga Mizoram-a chhiat tawk te tanpuina tur chu State Disaster Relief Fund (SDRF) atangin cheng nuai 450 pekchhuah ni tawhin Mizoram District zawng zawngah sum hi semchhuah mek a ni a. Tun tuma chhiatna thleng avanga chhawm-dawlna hna hi DM&R Minister K. Sapdanga hovin Department chuan theihtawp chhuahin an thawk nghal a, rikrum thil atana District tinin an sum kawlte sem chhuak phawtin a daih bak chu Mizoram sawrkar DM&R Department-ah an dil belh a. Chhiatna thleng hi a nasat avang leh District awm zawng zawng 11 te’n an tuar vek avangin Mizoram sawrkar chuan sawrkar laipui-ah SDRF sum hi a dil belh a ni bawk. DC-te hnena sum pekchhuah hi Respond & Relief atan cheng nuai 225 leh Recovery & Re-Construction atan cheng nuai 225, a vaiin cheng nuai 450 a ni.

Kumin (2024)-ah January thla atanga March thla tawp thleng khan Ruihhlo (Heroin) vanga thi mi 12 an awm tawh.